A páxina de Rock Santerre.

Non se trata dunha páxina musical, é que o señor Rock Santerre é profesor da Universidade Laval de Quebec e ten un sitio molón sobre xeodesia, do que me chama moito a atención a galería fotográfica sobre aparatos topográficos, con algún que nin aparece nos libros modernos máis que en debuxos. 

Aparte ten unha boa colección de ligazóns de Internet sobre xeodesia, apuntes, e moita información sobre aparatos GPS. É moi actual e podemos atopalo en idiomas inglés, francés e castelán, por todo o cal considero o site digno de ser tido en conta. 

E con isto creo que pecho o ano! Felices festas a todos!

Ingeniería y algo más.

Dende a marabillosa República Dominicana nos chega este blogue moi currado por Yimmy Alba cunha impresionante bibliografía sobre todo o que nos afecta aos que estamos na enxeñería: libros e máis libros sobre matemáticas, física, estruturas, pavimentos ou normas internacionais ao voso alcance con tal de facer clic nos enlaces que vos ofrecen. Aparte o blogue ten a súa propia páxina en FB na que vai poñendo as actualizacións das ofertas que aporta, por todo o cal o considero máis que recomendable. 

Sexas estudante, profesional ou profesor é un dos sitios que hai que ter en favoritos e revisar de cando en vez. 

Saúdos e feliz ano novo. 

O máis sinxelo programa de deseño de pontes articuladas.

Como dicía o clásico “as ciencias adiantan que é unha barbaridade!”, e a día que pasa máis aínda.

Creo que tería eu sobre cinco anos cando vin por primeira vez “Morreron coas botas postas” (cunha tele en branco e negro que soio collía dúas cadeas que de propina pechaban a emisión á hora da sesta) e chamárame a atención a parte do film desenrolada na academia militar de West Point, toda unha institución nos USA. O que menos podía esperarme daquela é que eu podera un día chegar a trastear con programas feitos directamente dende tal academia, pero o certo é que aquí temos un que ademáis é chistosísimo e francamente útil para desenrolar conceptos básicos e non tan básicos do cálculo estructural, que a verdade o de facer polígonos de Cremona sempre me pareceu pouco didáctico (a ver se non me levo unha bronca á volta das vacacións por dicir isto).  

Cando elaborei unha UD de estruturas para tecnoloxía xa me vira con este programiña, na súa versión de 2007, que atopei case de casualidade buscando información para deseño de pontes, se ben en West Point teñen unha sección de enxeñeiros que no parece para nada conformista e ano a ano vanlle facendo melloras, esperándose a nova versión 2013 para xaneiro próximo. Cabe engadir que a academia fai un concurso de creación de pontes on-line dirixido ao equivalente á ESO en Norteamérica, con premio para o mellor deseño de ponte. Por suposto que o programa é de descarga libre con dominio público e instálase en Windows sen problemas. A versión 2012, dende esta ligazón.  

O funcionamento é moi sinxelo e intuitivo aínda que non saibas inglés, basicamente consiste en establecer unha luz de ponte (polo que vin poden facerse pontes de ata dous tramos con apoio intermedio) e unha altura sobre río, coa posibilidade de darlle apoio en estribos normais ou asegurando mediante cableado. 

Faise un deseño básico baseándose en barras e nodos (encontros de barras) que o propio programa dimensiona e que non teñen maior complicación para delinearse. 

Unha vez deseñada a ponte podemos facerlle sen máis unha proba dinámica para comprobar a resposta da estrutura ao paso dun camión, proba que podemos ver dende fóra da ponte ou incluso dende a cabina do camión, e na que se mostran en bermello as barras comprimidas e en azul as traccionadas, e se indican as deformacións producidas en cada momento do paso do camión, indicando qué elementos deben reforzarse. 

Comprobada a ponte cabe logo facer un traballo máis técnico buscando a optimización de elementos da mesma a fin de obter o mínimo custe de construción, custe que tamén calcula o programa en tempo real. 

Como problemiña, pois que as unidades non se dan en SI se non en sistema saxón (xa sabedes, pes, pulgadas, etc...) e por suposto o orzamento do mesmo tamén aparece en dólares, se ben como traballo base non está nada mal. O que me pregunto mirando isto é se os programas de cálculo que manexamos os técnicos europeos non poderían ser igual de simples e transparentes. De todas maneiras aquí vos queda por se queredes xogar un pouco os que poidades disfrutar dunhas vacacións e teñades curiosidade polas obras civís. 

Disfrutade del coma se fora un xogo.

Boas festas. 

Operacións básicas de campo en topografía.

Ainda que xa puxen un destes vídeos, vou agrupar estes tres en outro post xa que agrupan as principais operacións con nivel e teodolito electrónico, incluíndo as fundamentais operacións de estacionamento de aparatos que debemos mirar en aulas e que varían según empreguemos nivel ou estación total. Como sempre, agradecer a distribución da canle Youtube da UPV e esperar que máis universidades e centros educativos se apunten a iniciativas como estas. 

Nivelación xeométrica. 

Estacionamento e lectura con teodolito. 

Enlace de Moinot para itinerario con estación total. 

Bioconstruirme

Deixovos tamén un interesante blogue sobre bioconstrución e permacultura en Galicia, feito por unha compañeira aparelladora e unha bióloga (Carolina e Paula, respectivamente) con cantidade de información sobre materiais ecolóxicos, bioconstrución e eficiencia enerxética. Van poñendo un interesante listado de cursos para min insospeitados e moitos enlaces a páxinas relacionadas co tema, así que se estades no mundo da construción ben podedes botarlle un olliño, seguro que vos aproveita.

Vai para o listado de blogues amigos e tamén vos deixo aquí ligazón. 

Adiante a revisión do PXOM de A Coruña

Como informa a día de hoxe COPE Coruña, o concello da cidade anuncia que o próximo 26 levarase a pleno a revisión do PXOM para obter a aprobación inicial, a fin de contar co visto bo da Xunta nos tres primeiros meses do ano próximo.

Como se cadra se vos da por consultalo, vos poño a ligazón correspondente.

Espero que vos sexa útil, sempre podemos discutilo por aquí. Deica.

O viaducto do encoro de Contreras.

Se ben os cálculos e o deseño son unha parte clave na construción dunha ponte, a complexidade desta que vos traio hoxe obriga a un proceso construtivo que constitúe todo un traballo en sí mesmo. Como podedes comprobar unha cousa é facer os planos desta obra de enxeñería e outra é levala a cabo. O que ocorre é que sen unha execución adecuada os planos non pasan de ser unha elaboración mental.

O que vos ven aquí ven sendo o viaducto do AVE no encoro de Contreras, entre Castilla La Mancha e Valencia. A ponte pertenece a ADIF, foi construída pola UTE San José-AZVI e tivo como proxectistas a Javier Manterola, Antonio Martínez, Juan Antonio Navarro e Silvia Fonte.

 

E como corresponde a unha obra de tales características a precisión adquire niveis incomprensibles, como mostra a infografía.

 

Tamén considero digna de destacar a integración no ambiente lograda, para mostra un botón achegado por un compañeiro pescador.

 

10 anos de licenzas Creative Commons.

Cúmprense 10 anos da creación das licenzas Creative Commons. E dez anos despois apenas parecemos saber nada das mesmas, así que plantexo esta entrada como outro recordatorio.

A primeira cuestión que debemos plantexar é que cada vez que facemos un contido divulgativo temos que apoiarnos en fontes e que as mesmas sempre estarán dun ou outro xeito sometidas a dereitos de propiedade intelectual. Así, cada vez que eu faga un artigo no blogue tería que solicitar permisos para difundir información, xa que a maior parte da que cito non me pertence. Isto podería acabar sendo un lío para o propio autor, que podería verse asaltado na rede por solicitudes para empregar o material, e o certo é que dificultaría a distribución de documentación posta a libre disposición dos internautas.

Se ben cando nos atopamos con material protexido por copyright nos atopamos con que tódolos dereitos están reservados, cando temos un material protexido por unha licenza Creative Commons (a partir daquí CC) algúns dos seus dereitos están reservados. Se atopamos un curso con licenza CC o dereito de facer copias pode estar aberto ao público. Pode parecer un pouco difícil de explicar, así que igual este vídeo vos aclara algo. 

O que quere dicir isto é que o material baixo licenza CC non é de libre emprego como nalgunhas ocasións temos escoitado. CC adopta unha posición intermedia entre a libre distribución e o copyright, de xeito que se convirte nunha ferramenta útil para o autor novel, que pode distribuír por Internet coa pretensión de que o seu traballo sexa recoñecido sen que as multinacionais se apropien do seu traballo, o auténtico gran perigo para a distribución libre na rede.

Agora ben, cando se emprega unha licenza CC o autor pode escoller entre diferentes condicións da mesma, o que dará lugar a diferentes xeitos de manexo do traballo. Son os seguintes:

Recoñecemento (Attribution): o creador permite copiar, distribuír e comunicar publicamente a obra a condición de citar adecuadamente ao autor orixinal. Exprésase coa seguinte icona: 

Non comercial (Non commercial): permítese comunicar, distribuír e comunicar publicamente a obra mentres non se empregue con fins comerciais.

Exprésase coa seguinte icona: 

Prohibición de obras derivadas (No derivate works):  permítese comunicar, distribuír e comunicar publicamente unha copia da obra, pero non realizar traballos derivados dela.

Exprésase coa seguinte icona: 

Redistribución baixo a mesma licenza (Share alike): permítese distribuír obras derivadas soio baixo unha licenza idéntica á que regula a obra orixinal.

Exprésase coa seguinte icona: 

Agora ben, estas catro condicións básicas poden reagruparse de xeito que podemos efectuar ata 11 combinacións posibles da licenza CC, poidendo quedar a mesma como segue:

Agora ben, o emprego deste tipo de licenzas conduce a cousas tan chamativas e interesantes como a creación do Barcelona Creative Commons Film Festival, un festival de cine tan metido na web 3.0 que están na procura de asociacións e particulares que queiran copiar o festival. Sí, como acabades de ler, podedes realizar este festival en calquera lugar do mundo. 

E simplemente con estas ideas pretendía deixar a entrada no blogue, aínda que se hai dudas ou consultas ao respecto, o que suscribe intentará, dentro das súas limitacións, dar resposta ás mesmas.

Ainda que como confío nas ansias de coñecer máis persoalmente e de ir ás raíces deste novo xeito de distribución, vos deixo as fontes das que tirei información para o artigo. 

Creative Commons España.

¿Qué son as licenzas Creative Commons?

Tipos de licenzas Creative Commons. 

Mª José Blanes: análise das licenzas Creative Commons. 

Cómo engadir unha licenza CC a unha páxina. 

Barcelona Creative Commons Film Festival. 

Espero que vos tivera servido de algo. Feliz fin de semana.  

A páxina de Emma Pérez para deseño web.

Pois hoxe tócalle á páxina da compañeira da EASD Antonio Faílde Emma Pérez Teijeiro.

Dende a páxina podedes acceder a varios temas, ainda que o que máis me chama a atención é a súa lista de enlaces para deseño web.

Titorias, plantillas, tipografía, ferramentas e hosting, case todo de libre acceso, á disposición de todos, e se sabedes dalgún enlace máis que se lle poida pasar facédello saber, que seguro que o agradece.

Deica.

Subtitula as túas películas.

Como son novato en esto de subtitular vou poñer isto máis que nada para guiarme a min mesmo, polo que seguramente vaia modificando e na medida do posible ampliando este post. Seguramente vou engadir outros métodos a medida que vaia probando, pero de momento vos propoño un bastante simple. 

Como xa teño dito cenes e cenes de veces un idioma estranxeiro éntrache polo oído, así que escoitar pelis subtituladas é un exercicio fantástico para meterse noutros idiomas. Agora ben, se te baixas unha peli, dado que moitas veñen sen subtítulos, cómo subtitular a mesma?

Empezando por ahí imos ter que baixarnos unha peli en VO. Se non conocedes enlaces temos uns cantos, eu manéxome con películas yonkis, por descarga directa, movies planet, ou telechargementz segundo o idioma que me pareza. 

Unha vez baixada a película en idioma orixinal o que temos que localizar son os subtítulos, e localicei outra páxina na que podemos atopalos en calquer idioma: sí, tamén os hai en galego! Estes subtítulos veñen en arquivos de extensión .srt, non é habitual que dean problemas de virus e non me teñen dado problemas ao descargar. 

Cando se descargan, o que fago é unha carpeta para a peli onde deben ir  xuntos o arquivo de subtítulos e o arquivo de vídeo. E agora ven un punto importante: qué tipo de arquivo de vídeo nos baixamos?

Moitas veces os arquivos de video baixados dan problemas pola falta de códecs, especialmente de sonido, polo que é bastante habitual descargar unha peli das páxinas anteriores e que non teña sonido, ás veces nin siquiera imaxe. O que teño feito para remedialo é tan simple como baixarme un programa específico para ver videos, trátase do Media Player Classic - Home Cinema, e podedes baixalo dende aquí. Con él non tiven problema para ver ningún tipo de película, sempre e cando o arquivo da mesma non estivera danado, e valeume para todas as extensións de video que teño probado. 

Así pois, a estas alturas teremos nunha carpeta o arquivo da peli (seguramente un .avi) e o arquivo de subtítulos con extensión .srt.

Pois o importante a estas alturas é que ambos arquivos deben ter exactamente o mesmo nome. Así que dádelle a modificar un ou outro, pero que teñan, fóra da extensión, o mesmo título ou non funcionará o procedemento que vos detallo.

Cos dous nomes iguales facemos click co botón dereito sobre o arquivo de vídeo, escollemos Abrir con e dámoslle a Media Player Classic. Cando abra no menú de comandos, á esquerda de todo, entramos en File, facemos click en Load Subtitle e nos abre unha pestaña que xa debera estar restrinxida á carpeta do video, polo cal escolleríamos o .srt e directamente cargaríamos os textos de subtítulo.

Se non vos sale á primeira intentádeo máis veces. Se cadra o procedemento vos parece algo peñazo, pero con esto te evitas baixar programas específicos de cargado de subtítulos, algo que pretendo poñer neste mesmo post cando teña tempo de miralo. Por último indicar que os subtítulos se ven á par da película, pero non quedan incrustados na mesma e podedes eliminalos simplemente volvendo a entrar no menú File. Como contrapartida, tenme pasado que ao adiantar a peli movendo o cursor de avance do arquivo os subtítulos moitas veces se me descoordinan e non seguen o tempo da peli. Máis endiante intentarei remedialo.

Boas noites a todos. 

Oficalc, a mellor calculadora científica no teu PC.

Pois non conocía Oficalc e leveime unha sorpresa cando o atopei instalado nos ordenadores do centro. 

Trátase dun programiña elaborado polo centro de formación Ofimega academies s.l. de Salou como medio de aprendizaxe de linguaxe Pascal, polo que podes acceder ao código fonte.  

Como ferramenta paréceme moito máis útil e potente que a tradicional calculadora de Windows, xa que aporta multitude de funcións trigonométricas e estatísticas, aparte de cálculo directo de áreas, conversión universal de unidades, xeometría e un área de química coa táboa periódica e características atómicas. De todos os xeitos as sucesivas versións (agora mesmo van pola 10.1) van incorporando melloras e funcións. 

Recomendable para estudantes e profesionais, para min é a mellor calculadora que me atopei desde que se estropeou a miña añorada Casio FX-702P. Tamén pode ser instalada en varios idiomas, ainda que non en galego, cachis...

E a tendes aquí, na área de descargas, completamente de balde. 

Deica logo. 

Cálculo de redes de saneamento en HA

Paseando pola nube atópome un programa de cálculo de tubos, e xa postos, de cálculo de redes de saneamento con tubos de HA elaborado pola ATHA (Asociación Española de fabricantes de tubos de Hormigón Armado), que como é gratuíto e ten relación co que miramos por aquí pois o colgo por se vos vai ben. O link aquí.

En xeral paréceme bastante completa, especialmente no de ofrecer apartados como a súa biblioteca de publicacións na que tamén oferta, aparte de datos de cálculo, algunha ficha técnica como a de probas de tubaría instalada. 

Como os suministradores de materiais tamén teñen que facilitar o seu concurso, teño atopado ademáis na páxina de Uralita uns programiñas para que fagas o mesmo pero con tubaría de PVC, incluíndo as famosas táboas de Prandtl-Colebrook.

En todo caso recomendo botarlle unha visual a ambas páxinas se estades facendo cousas de instalacións urbanas, parécenme moi recomendables.

Ah, e se hai que calcular os valores das precipitacións máximas tendes esta monografía do Ministerio de Fomento: "Máximas lluvias diarias en la España Peninsular".
Deica.

O concurso de maquetas de pontes de enxeñeiros de Bilbao

A verdade moito me temo que se empezo por decirvos que os enxeñeiros de Bilbao fan pontes de mondadentes que aguantan pesos de 700 kilos ides pensar que estou a botar un chiste de bilbaínos. Pero nada máis lonxe da realidade.

A Escola Técnica Superior de Ingeniería de Bilbao xa ten celebrado 11 edicións do concurso de maquetas de pontes feitas con palillos. Estes concursos están acadando cada vez máis fama ata o punto que xa vexo aquí o inicio dun novo deporte basco, á altura das competicións de erguemento de pedras, carreiras de bois ou sega de fincas. De feito este certame xa é patrocinado pola BBK.

Se cadra o único que lle vexo como defecto é que aínda é un certame limitado a poucos participantes (un dos seus concursantes leva gañadas 7 das 11 competicións) e que o número de estruturas presentadas tamén é pequeno, quedando o último ano en 7. Por outra parte o certame establece dous premios, un para estética (o mellor deseño) e outro para resistencia (as pontes presentadas sométense a carga ata que parten, tendo o autor da última que quede en pe o privilexio de poder “indultala”), polo que o esmero na elaboura da maqueta tamén da satisfaccións, o que non é de estrañar vendo algún dos deseños.

Vos deixo con outro video, recopilación das reportaxes televisivas e unha entrevista de radio efectuadas sobre o evento, que nos da unha idea do traballo fantástico que fan estes alumnos, que aparecen comentando as súas obras, o cal non deixa de ter algo de interés se pensamos no tempo que adicamos a escoitar os estúpidos comentarios que fan a maioría dos futbolistas tras cada partido.

Polo menos se nos recortan en ensino e nos retiran laboratorios e material informático vainos quedar facer enxeñería con mondadentes. 

Canle de videos da Universidade de Vigo.

Buceando pola rede me atopo coa televisión da Universidade de Vigo. 

Consiste a mesma nunha colección de videos desta entidade, moitos deles con valor educativo (moitas conferencias interesantes) e tamén con información institucional. 

Xornadas, proxectos, videocurricula, homenaxes e conferencias tamén dispostos ao libre acceso simplemente con clikar os mesmos.

Como botón de mostra vos deixo unha conferencia sobre o impacto dos parques eólicos na fauna, en especial aves e morcegos, a cargo de Francisco Arcos, técnico de recursos naturais da consultora de medio ambiente Arcea. 

A ponte do AVE en O Eixo (Santiago de Compostela)

A construción de pontes é tanto unha arte coma un oficio. Neste caso vos traio o simpático video da construción da ponte no Eixo para o AVE a Santiago de Compostela, elaborada pola empresa galega Grupo Puentes. 

Cabe engadir sobre o mesmo que as forzas provocadas por un tren de alta velocidade superan con moito as provocadas polo tráfico motorizado. Isto obrigaba a crear no centro do viaducto un punto fixo, e para conseguilo se efectuaron dúas pilas de formigón armado que foron posteriormente abatidas (creando unha rótula no seu apoio) ata o seu encontro, formando un arco cuxa clave sería o punto fixo da ponte. 

As pilas son de formigón armado, e a sección da ponte de caixón de formigón armado. A contratista principal foi OHL e a propietaria ADIF, con estrutura calculada por Pondio Ingenieros. Recomendo de todos os xeitos mirar o video con atención a fin de comprobar a magnitude dos traballos efectuados, indescriptible polo tamaño dos elementos e a precisión requerida. 

Atopar traballo en redes sociais e Internet.

35webs.com ten preparado esta guía para os que buscan traballo, e cólgoa no blogue xa que a ofertan gratuitamente e piden darlle a máxima difusión.

Esta guía parte do principio básico de afrontar coa cabeza fría a difícil situación do desemprego. Comeza por repasar a redacción de CV (incluíndo cómo convertilo nunha infografía) e carta de presentación,  buscadores de emprego xerais e específicos, e por suposto o uso de Facebook, Linkedin ou Twitter para mostrar a túa busca. Incluso cómo preparar unha entrevista laboral a través de Skype.

E todo con amplas referencias web por se queres ampliar información e puntos de contacto.

Se estás buscando emprego non digo que o poidas conseguir grazas a esta guía, pero pode botarte unha man nun momento en que o mercado laboral é unha loita a cara de can, espero que te sirva de algo e que teñas moita sorte.

Deica. 

O blogue de Ana Varela.

Ben, se lle publiquei unha entrada a Mónica Folgueira terei que adicarlle outra á miña hirmá, que tamén ten o seu propio blogue. 

Agora ben, non atopo xeito de describir o mesmo, dado que me perde un pouco ir vendo cómo a miña hirmá vaise transmutando en Uma Thurman amputando membros en Kill Bill, ainda que se trate dunha metáfora. Sen embargo non deixa de sorprenderme o seu mergullamento na arte marcial do Iaido Kendo. Do mesmo o concepto que xa me sonaba era o de encarar a loita non como un combate entre contrincantes físicos senon como unha loita contra un mesmo.

Por suposto que o blogue destila conceptos, sabiduría, arte e tradición oriental, ata o punto que lendoo entran ganas de coller unha katana de madeira e liarse a mamporros con todo bicho vivinte. 

Cando menos espero que vos sirva para coñecer algo máis da milenaria e fantástica cultura xaponesa. 

Boas noites. 

Convalidar titulos para traballar en Alemania

"Vivir y trabajar en Alemania" é unha páxina con interesantes informacións para aqueles que, a diferencia de min, tedes unha idade tal que vos queren en Alemania. 

Nesta entrada ofrecen unha información bastante valiosa sobre a convalidación de títulos en Alemania. 

Cabe engadir como apunte que o proceso de convalidación correspóndelle a cada "land", ainda que se especifica que o goberno federal está pola labor de harmonizar as convalidacións. Despois falan das autonomías españolas...

En fin, ahí vos queda o link da entrada. 

Deica logo. 

A ponte Woodrow Wilson

A conexión dos estados de Virginia e Maryland no entorno da cidade de Washington, unha megaconstrución das de agarrarse. 

Aprender xaponés grazas á tv xaponesa.

Se queres aprender xaponés, a NHK (radio e televisión públicas do Xapón) poñen estes contidos tan favorables aos hispanofalantes. 

Trátase dun curso on line estruturado a xeito de radionovela titulada "Xapón, meu amor". Unha locutora latina da explicacións, os diálogos van a cargo de dobladores nativos. 

Ademáis se vos metedes na pestaña de radio e podcasts poderedes aprender a cantar "Subaru", a elaborar satsuma-age ou informarvos sobre o Festival internacional de cine de Tokyo. 

Que aproveite. 

Lista de vídeos en Youtube para aprendizaxe de idiomas.

Basta con facer unha pequena busca en Youtube para facerse con máis recursos lingüísticos. E busca que te busca atópome coa canle en Youtube de UrStreatWrld

Case nada atoparse unha canle coa que aprender italiano, francés e inglés. Como seguro que vos interesa, ahí vos queda a ligazón que leva a diferentes canles de aprendizaxe. Botádelle un ollo que ten boa pinta.  

http://www.youtube.com/user/UrStreatWrld/videos?view=1 

Boa finde. 

O Spotify dos libros.

A sociedade dixital avanza imparábel, ben o sabemos aqueles que hai vinte anos ainda andábamos polas aulas universitarias: pouco ten que ver o xeito de traballo actual con aqueles planos a grafo e aqueles orzamentos feitos sobre estadillos con máquinas de escribir que nos fixeron pasar tantas noites en vela.

Agora temos un novo paso nesto da lectura dixital: 24symbols nos ofrece as ventaxas de Spotify aplicadas ao mundo editorial. Tras un breve repaso vexo cousas que non entendo, como clasificar libros como Premium, de xeito que soio son accesibles tras un pago, cando entendo que o servizo Premium debera limitarse a opcións como a descarga ou o copiado e pegado. Por outra parte sorpréndeme ver obras clásicas como Chesterton, Flaubert ou Pirandello  directamente clasificadas como Premium, cando esta tipoloxía sería entendible de aplicarse ás novedades editoriais. 

De todos os xeitos parece unha páxina interesante que podemos ter en favoritos e da que haberá que ir seguindo a evolución en catálogo de fondos e en prestacións para o usuario libre. 

Como sempre, a última palabra téndela vos, ahí vos queda a ligazón.

http://web.24symbols.com/

A grande evasión.

Pedazo de peliculón! Sempre esperando a segunda hora, minuto 25!

Os blogues de Mónica Folgueira

O persoal. 

O profesional.

Estacionamento de teodolito.

A UPV estame dando grandes satisfaccións a base de OCWs e canles de video con clases.

Por se queredes lembrarvos do estacionamento dun teodolito para comezar un traballo topográfico, aquí tendes unha pequena clase sobre o mesmo. Máis na canle de Youtube da UPV. 

Deica. 

"Bloguía de empleo"

Nestes tempos nos que tanto importa buscar ou conservar un traballo, aparece esta guía para facer ambas cousas. Téñolle botado un ollo e convenceume bastante, espero que a vós tamén.

Deica. 

Abre as súas portas a escola galega de Administración Pública?

Sinceiramente descubrir o OCW non me sorprendeu, pero que a EGAP nos faga o favor de mostraros seus contidos déixame coa boca abrida.

De todas formas, ainda que tarde, benvida sexa a nova que non deixa de ser moi boa. Xa que teño unha conexión lenta en casa non podo mirar se se pode aceder aos cursos de teleformación, non me importa que sexa pagando, pero a documentación, presentacións e arquivos de imaxe incluindo clases e conferencias seguramente nos axuden aos que temos, tivemos ou simplemente esperamos ter relación co sector da administración galega. Temas como servizos públicos, lexislación, urbanismo, turismo e políticas públicas, se son impartidos pola administración non teñen por qué estar mortos de risa nun caixón ou nun arquivador AZ, é lóxico e necesario que estean a disposición dos cidadáns.

Estes días intentarei botarlle unha ollada, se advirto mais cousas interesantes nesta páxina publicareino nos comentários da entrada. De todos os xeitos esa é unha labor que ben pode facer tamén o amigo lector.

Deica.  

Outro blogue de Víctor Yepes.

Se os anteriores teñen un carácter máis persoal, este é o blogue oficial da súa asignatura Procedimientos de Construcción, na UPV. Moi recomendable se queredes aprender calquera cousa de enxeñería civil. 

E, por suposto, outro video como mostra. 

Deica. 

O blogue de Víctor Yepes.

Víctor Yepes Piqueras imparte clase na Universidad Politécnica de Valencia, e tamén se encarga de distribuír os seus apuntes pola rede.

Podemos atopar información recopilada por él no seu blogue ou na súa páxina web, aínda que me interesan moito as súas clases impartidas a través da rede en Youtube. 

Para mostra un botón: para a análise do traballo da maquinaria nos explica neste simpático vídeo cómo elaborar un diagrama PERT.

Deica.  

APETEGA

Graciñas a Raquel Alonso, temos tamén a ligazón á páxina web da Asociación do Profesorado de Tecnoloxía de Galicia. 

Por certo que na mesma denuncian que o novo anteproxecto de LOMCE fai desaparecer as materias de Tecnoloxía, reducíndoas a 1º de ESO. Ollo ao dato e os que temos que ver co ensino mellor que sigamos o desenrolo desta lei.

Deica. 

.

La educación prohibida.

Ahí queda. 

O ensino da construción hoxe.

Rebuscando pola rede atópome con este interesante artigo elaborado polos profesores Angeles Mas, Vicente Blasco e Carlos Lerma, profesores da UPV.

No intre en que nos atopamos, inmersos xa no proceso de Bolonia e sometidos a un proceso de revolución no acceso e divulgación da información sen precedentes na historia, é evidente que os profesores deben replantexarse a súa labor e a interacción co alumnado, aparte de modificar no preciso a súa metodoloxía, que xa non pode obviar as redes sociais.

Ao respecto o artigo aborda estas novas tecnoloxías coa súa aplicación ao ensino da construción na universidade (perfectamente aplicable aos eidos do ensino secundario e formación profesional).

Independentemente do acordo que se teña cos argumentos e conclusións, considero adecuada unha revisión autocrítica da metodoloxía en base ao artigo, en liña coa idea de permanente reciclaxe e adaptación que se lle supón ao profesorado, hoxe máis importante que nunca. Por suposto que a iniciación dun debate sería moi interesante.

Deica logo.