ETICS: Illar os edificios cambiando a súa pel polo exterior.

Logo teríamos que buscarlle un nome non anglosaxón para o sistema ETICS (External Thermal Insulation Composite Systems with Rendering), pero polo momento é como se lle coñece á técnica de incrementar a inercia térmica da envolvente do edificio mediante a aplicación de illamento polo exterior sen destrución de fachada. Podemos irnos facendo cargo que a técnica ten moitas posibilidades se ben dúas vantaxes sobresaen da mesma: con ela eliminamos por completo as pontes térmicas e podemos facer unha rehabilitación destiñada a mellorar a eficiencia enerxética dun edificio sen perda de superficie útil nin desaloxo dos ocupantes, dun xeito relativamente pouco agresivo. 

Sistema: 

Os ETICS consisten nun illamento térmico polo exterior, conformados por un panel illante prefabricado adherido á envolvente do edificio, mediante adhesivo e fixación mecánica. 

O illamento queda protexido mediante unha ou varias capas de morteiro, unha das cales leva unha malla como reforzo. O revestimento aplícase diretamente sobre o illante, sen cámara de aire. 

Vantaxes técnicas do sistema: 

1 Os ETICS aplícanse de xeito contínuo por toda a fachada, de xeito que o seu emprego evita a formación das pontes térmicas habituais en pilares de fachada, encontros fachada-forxado e dintel e peana de ocos. 

2 Redución das oscilacións térmicas en fachadas, o que repercute nunha diminución das fisuras provocadas en fachada polos continuos cambios climáticos. 

3 Mellora sensible do comportamento da fachada ante a penetración de auga. 

Compoñentes do sistema: 

1 Placas illantes: a máis empregada é a placa de poliestireno expandido EPS con densidade de 20 kg/m3 e espesores de 40, 50, 60 e 80 mm, con marcado CE según UNE EN 13163. Son válidas tamén as placas de poliestireno extruído XPS con marcado CE según UNE EN 13164 e as placas de lá mineral con marcado CE según UNE EN 13162. 

2 Ancoraxe mecánica: ancoraxe plástica de polipropileno con aditivos. Debe escollerse a súa lonxitude en función do espesor da placa de illamento a fin de que a atravesen por completo ata o soporte, cunha profundidade de ancoraxe mínima de 40 mm. Os tamaños comúns atópanse entre 90 e 120 mm. Dispoñen de marcado CE segundo guía DITE 014. Cada casa subministradora fai indicacións do xeito de colocación e número de ancoraxes precisos. 

3 Morteiro adhesivo: de base cementosa, con áridos, adhesivos e resinas, queda listo para o seu emprego unha vez mesturado con auga. Por toda a cara adherida, preferentemente percorrendo o borde e aplicando pegotes no centro. 

4 Morteiro de capa base: aplicado directamente sobre as placas de illamento para reforzo da superficie, con llana ou máquina de proxectar cun espesor aproximado de 2 mm. Aplicarase en dúas capas, e ao rematar a primeira colocarase a malla de reforzo. 

5 Malla de reforzo: armadura de fibra de vidro con misión estabilizante fronte a variacións térmicas e resistencias mecánicas. Existen dous tipos: malla normal para as partes altas do edificio (con peso de 130-200 g/m2) e malla reforzada (con peso de 735 g/m2) para zonas onde exista maior risco de impactos: zócalos, tramos inferiores de fachada, cantos de ocos ou alféizares, etc.Con solapes de 10 cm e nas aristas dando unha volta de 25 cm, e colocada a 45º en esquiñas de ocos. 

Colocarase sobre a primeira capa de morteiro mentres está fresca facendo presión para que quede embebida, e tras o secado da primeira capa de morteiro botarase unha segunda que cubrirá completamente a malla de fibra de vidro. Tras aplicar a segunda capa e esperar un pouco se pasará por todo o enfoscado unha esponxa ou fratás, deixando a superficie o máis lisa posible. 

6 Perfís: de aluminio para aportar resistencia mecánica. En forma de U para a liña máis inferior do revestimento e en esquiñeiro para reforzo das placas en encontros. 

7 Imprimación: aplicada 24 horas da segunda capa de morteiro aplícase unha imprimación de fondeo con brocha ou rodillo para igualar e como ponte antes do acabado final. 

8 Capa de acabado: mediante proxección, fratasado, raiado, talochado ou directo. como remate final.  

Beneficios: 

Múltiples. Comezan por un importante aforro enerxético, un aumento da inercia térmica do edificio que favorece tanto en estación cálida como fría, aforro económico para o propietario e un nada desdeñable incremento do período de vida da fachada. 

Como sempre hai que saber algo máis, vos deixo as referencias web de onde tirei a información. Saúdos. 

Webgrafía: 

Guía IDAE SATE para la rehabiltación de la envolvente térmica de los edificios.  

http://www.anfapa.com/pdfs/etics.pdf#page=2

http://www.anfapa.com/pdfs/articulos_etics5.pdf

http://www.arquisolux.com/herramienta.php/es/40

http://www.topox.es/media/pdf/esp/Aislamiento_por_el_Exterior_TOPOX.pdf

http://www.basf.es/ecp1/Spain/es_ES/function/conversions:/publish/upload/02_Products_Industries/02_Solutions/SM10MAD-Final

http://basf.xeradordeprezos.info/basf_ob_heck_mad/index.html

http://www.sate-etics.com/

http://www.interempresas.net/Logistica/Articulos/42811-Sistemas-ETICS-una-nueva-piel-para-los-edificios.html

Primeira sanción por falsear unha certificación enerxética.

Nesta nova publicada no diario El Mundo observamos que un técnico, do que non se recolle a titulación, foi multado pola comunidade de Madrid por falsear unha certificación enerxética. 

Debemos prestar atención ao feito de que o técnico asinou unha cualificación enerxética A, cando a vivenda correspondíalle unha clase C. 

Ao parecer, a Comunidade está efectuando labouras de vixiancia das certificacións expedidas, centrándose nas que obteñen cualificación A ou B. 

O importe da sanción foi de 4.000 euros. Cabe recordar que os seguros de responsabilidade civil normalmente non inclúen o abono de multas.  

Coidadiño e saúdos. 

Nivelación topográfica para principiantes.

Paseando por Internet atópome esta monografía de topografía para principiantes, enviada por Jesús Murillo.

Como nunca está de máis repasalo para os que a demos nin mirala para o meu alumnado, ahí vos queda.

Ah, xa que estamos co asunto da topografía tamén unha presentación en Slideshare de Carlos Pajuelo sobre procedementos de control topográfico en estradas.

Saúdos.

Tarifas mínimas... para o sector público.

Canto máis penso no que foi a eliminación por parte do goberno das tarifas mínimas colexiais a aplicar a encargos efectuados polos colexios profesionais máis penso que foi unha medida apresurada que non tivo en conta o efecto tan coñecido pola administración de "baixa temeraria", e que entendo que trouxo graves problemas de ausencia de calidade no sector da edificación.

Agora ben, agora resulta que hai que facer certificacións de EE nos edificios e hoxe o Ministerio de Hacienda publica unha resolución pola cal autoriza unhas tarifas mínimas a cobrar pola Sociedad Estatal de Gestión del Patrimonio SEGIPSA, que cobrará uns mínimos bastante ben especificados pola administración, é dicir, por ela mesma.

Os de a pé seguiremos a ser paganos.

Captación e almacenamento de auga potable en Pamplona.

Un pequeno video sobre a captación, potabilización e almacenamento en depósitos do subministro de auga potable á cidade de Pamplona.

Máis, moitísimo máis sobre os MOOCs.

Despois da primeira, a segunda e a terceira, esta sería a cuarta entrada que facemos neste blogue sobre os MOOC. Aínda que non dubido que o interese que os mesmos producen xustifica sobradamente tal atención.

De todos os xeitos podemos facer un rápido repasiño sobre os mesmos: o termo MOOC, ou Curso Aberto Masivo Online, comezouse a empregar en data tan recente como o ano 2008 por David Cormier, quen facía labouras de comunicación web e innovación na Universidade de Prince Edward Island.

Os MOOC son cursos universitarios aproveitables por calquera persoa en calquera parte do mundo sen custe algún. Non se reciben créditos por eles, pero algúns permiten a obtención dun certificado de aproveitamento. Os cursos abarcan gran cantidade de materias e son deseñados por primeiras figuras nos campos abarcados. Moitos están en inglés, ainda que non todos e procurando un pouquiño localízalos en castelán.

Posiblemente o máis coñecido é Coursera. Segundo se pode obter da rede, ten arredor de 17.000.000 de matrículas de estudantes de 190 países, acadando 240.000 matriculados nun só curso. Oferta uns 400 cursos en máis de 20 categorías, disponibles en 12 idiomas diferentes.

Edx oferta MOOCs e aulas interactivas on line en materias como dereito, ciencia, enxeñería, ciencias sociais, informática, saúde e intelixencia artificial.

O  MIT de Massachussets publica de xeito gratuíto a maioría das materias impartidas nas súas aulas, ofertando máis de 2.000 cursos.

Stanford posúe tamén cursos en aberto, que ao igual que no caso do MIT son boas opcións se o que pretendes é seguir ao teu propio ritmo.

Dende Europa, en Alemaña Iversity oferta cursos en inglés e alemán que entraron na rede o pasado mes de outubro. Future Learn é subsidiaria da British Open University, e se prevé que os seus cursos estean en liña este mes de novembro.

Para aprender linguas Duolingo ofrece ensinanzas gratuítas en idiomas. Con respecto a programación Code Academy oferta leccións libres e interactivas.

Con respecto a Open Culture, pois que é unha páxina á que lle teño moita simpatía xa que ten precisamente o espíritu de paseandopolanube: o seu editor localiza na web cursos, películas, documentais e videos libres, albergándoos no seu site. Os cursos son de audio e video, podendo descarregarse no PC ou para lectores mp3.

Agora ben, se do que tedes ganas é de curiosear máis aínda xa vos deixo á vosa disposición unha listaxe moitísimo máis ampla en http://www.mooc-list.com/

Que pasedes un bó anaco con isto, tedes material para facelo!

Curso sobre a certificación enerxética con CE3X

Ten algúns fallos de video pero polo demáis é  ben interesante se estás no asunto. En dúas partes.

Algunhas puntualizacións sobre o novo DB HE.

Tras unha visual aos novos elementos, indicar que o novo DB HE, aprobado por Orden FOM 1635/2013, vai máis aló do simple aforro enerxético nos edificios. A pretensión deste documento é seguir a Directiva Europea 2010/31, co obxectivo de diminuír o consumo enerxético nos edificios ata que no ano 2020 os edificios de nova construción sexan practicamente autosuficientes, rebaixando o prazo para 2018 no caso dos edificios das Administracións Públicas. As esixencias non chegan aínda a tal extremo, se ben son previsibles novos cambios nun futuro ben próximo a fin de acadar tal obxectivo.

De momento a modificación non é obrigatoria ata o próximo marzo de 2014. Por outra parte afecta a edificios de nova construción e a ampliacións de edificios existentes.

Con respecto aos cambios, do que é unha vista por enriba podemos destacar as seguintes novidades:

1 Aparición da nova sección HE 0. A partir de agora non chega con dar unha cualificación enerxética ao edificio ou ampliación proxectados, se non que o documento establece un límite directo ao seu consumo mediante expresión de kwh/año m2, límite que se establece en función da zona climática onde se atope o edificio e da superficie útil do mesmo. Para isto emprégase unha fórmula que calcula o consumo máximo de enerxía nos servizos de calefacción, refrixeración e ACS.

Se ata agora metíamos o edificio proxectado en LIDER ou CALENER e simplemente mirábamos que letra obtiñamos en función de como o tiveramos deseñado, agora temos unha limitación clara ao consumo máximo. Agora ben, o que se fixa agora é o consumo de enerxía, e non as emisións de CO2. Loxicamente son esperables actualizacións nos programas LIDER e CALENER para poder efectuar con eles esta labor.

2 Cambios na sección HE 1: esta é a sección de limitación de demanda enerxética. Pois ben, o documento comeza por poñer un límite ás demandas de calefacción e refrixeración, o que obriga a unha incidencia clara nos valores de illamento, que poden elevar o espesor do mesmo ata 8 cm.

Tamén debemos recordar que neste documento do ano 2006 deseñábamos o noso edificio, que era o edificio obxecto, e que tanto LIDER como a opción simplificada creaban un edificio de referencia, igual ao edificio obxecto pero que cumpría o DB HE1, e a esixencia consistía en lograr que o noso edificio tivera unha demanda igual ou mellor que a do edificio de referencia.

No documento do ano 2013 a esixencia é unha demanda determinada para calefacción e refrixeración, polo que LIDER e a opción simplificada CE2 deixan de ser válidos ao non dar directamente os valores límites das demandas.

3 Cambios na sección HE 3: esta é a sección de instalacións de iluminación. Fanse máis esixentes os valores VEEI para cada uso, e efectúase unha limitación de potencia máxima en función do uso.

4 Cambios na sección HE 4: esta é a sección de contribución solar da ACS. Simplifícanse táboas e cálculos. A contribución solar mínima depende nada máis que da zona climática e modifícanse os valores unitarios de consumo de ACS en función do uso. Deixamos mapa e táboas de zonas climáticas para empregar o dato de radiación media diaria da localidade.

Por último, deixar os documentos de apoio (DA) seguintes publicados un pouco despois da publicación do novo EH.

DA DB-HE 1:Cálculo de parámetros característicos da envolvente.

DA DB-HE 2: Comprobaciónda limitación de condensacións superficiais e intersticiais nos pechamentos. 

Novas versións dos programas CALENER e LIDER adaptadas ao RD 235/2013

A fin de completar a adaptación con respecto ás disposicións do RD 235/2013, sobre todo no referido a edificios existentes, están actualizados os programas de referencia para a calificación de EE de edificios mediante o procedemento xeral.

Estes programas quedan como:

CALENER GT: para cualificación de EE de grandes edificios do sector terciario.
CALENER VyP: para cualificación de EE de edificios de vivendas e pequeno e mediano sector terciario.

Ligazón aos programas cos seus respectivos manuais técnicos e de usuario. 

Como seguramente vos vai facer falta tamén, vos queda ahí a ligazón ao programa LIDER, que se atopa na web do CTE con versión de 01 de xullo de 2009. Na mesma páxina tendes un manual de usuario.

En todo caso, LIDER non precisa actualización, xa que temos que lembrar que LIDER únicamente calcula a demanda enerxética dun edificio, sen elaborar a certificación de eficiencia enerxética. Para obter a certificación polo método xeral temos que calcular a demanda en LIDER e despois facer a certificación mediante CALENER.

Se hai dudas podemos comentalo.

Deica.

(Editado a 22 / 9 / 2013)

Incorpórase como programa o CERMA, ferramenta que permite a calificación da Eficiencia Enerxética dos edificios, como documento recoñecido para a Certificación Enerxética. Dende agosto está dispoñible no Rexistro de Documentos Reconocidos de Certificación Energética de Edificios para certificar tanto vivendas novas como existentes.

Polo tanto, a data de hoxe para certificar edificios existentes coa opción simplificada dispoñemos de tres programas de cálculo como documentos recoñecidos:

CE3

CE3x

CERMA

Acceso aos rexistros de certificación de EE de edificios.

Como seguramente saibades, e se non o sabedes ide quedando coa copla, dende o 1 de xuño pasado é obrigatorio para edificios ou vivendas que se vendan ou alquilen un certificado enerxético.

E como o rexistro é autonómico xa temos o lío montado se temos que traballar en diferentes CCAA, así que esta entradiña nos di onde facelo.

Sí, o blogue este xa o tendes á esquerda no apartado de Normativa básica e calidade.

Os proxectos de Eduardo Torroja.

Se estades nesto do hormigón, non tedes perdón se non sabedes quén foi Eduardo Torroja, se cadra o enxeñeiro que realmente perfeccionou a técnica de armado e pretensado na península.

Pois a través de Estructurando (páxina polo demáis absolutamente recomendable), e concretamente nesta entrada, descubro que o CEDEX escaneou os orixinais dos seus proxectos e os deixa en formato pdf á vosa disposición, concretamente nesta ligazón. 

Solamente como exemplo (como ando un pouco apurado non descarguei e deixo as mesmas imaxes que hai na entrada de Estructurando) ver cómo vos podedes descargar os planos do proxecto da ponte sobre o Eo, incluíndo os cálculos e as notas manuscritas do mesmísimo Eduardo. 

De propina ligazón á páxina do Centro de Estudios Históricos de Obras Públicas y Urbanismo, organismo encadrado no CEDEX que efectúa a publicación e no que podedes atopar outras obras ben interesantes sobre a historia da obra pública estatal.

Deica. 

Office 2013.

O obxecto desta entrada é sinalar que a actualización de Office 2013 xa está na nube.

E se non queredes descargalo e activalo non vexades o video seguinte, nin entredes neste link. 

Deica. 

Manexo de datos entre Autocad e Excel.

Aínda que na entrada anterior xa puxemos algo ao respecto, quería subir un par de vídeos titoriais coas posibilidades de paso de datos entre Autocad e Excel, bastante útiles para cuestións topográficas. 

O primeiro nos indica cómo pasar puntos de Excel a Autocad. 

Este outro cómo pasar puntos de Autocad a Excel. 

O portal Konstruir.com

Pois o seu nome é o que aparece no título, konstruir.com. Nesta páxina cólganse definicións, fotografías e documentos sobre teoría de construción, posúe un foro e apartados de descarga,  e oferta utilidades completamente gratuítas para xustificación de diversos apartados do CTE, despece de ferralla ou elaboración de plannings de obra.

De propina poñen titorais en formato de vídeo na súa canle de Youtube, e xa postos pensei que non estaría de máis poñervos un par de vídeos dos que teñen na mesma. 

O primeiro nos explica cómo empregar a utilidade que eles mesmos ofertan para efectuar un planning de prazos e inversións de obra mediante diagrama de Gantt. 

O segundo nos indica cómo pasar puntos de replanteo de Autocad a unha táboa Excel. Bastante interesante para os alumnos de 1º de Edificación. 

Tamén queda un link directo á páxina na lista de ligazóns a apuntes xerais sobre construción. 

Ferramentas dixitais para mindmapping.

Empregaremos para referirnos a eles o termo saxón, se ben eu coñecinos como “diagramas orgánicos”, termo que me parece mais apropiado... en fin, o esnobismo parece estar bastante aceptado pola rede.

Un mapa mental consiste nun esquema de memorización representado de xeito radial, de maneira máis creativa e esquemática que un típico diagrama de chaves ou por puntos. Foron popularizados por Tony Buzan coa publicación no 74 do libro “Use yourhead”.

Ao elaborar un mindmap non metemos no mesmo toda a información, se non unha representación da mesma: a clave cando se elabora este tipo de esquemas é organizar a información e aumentar o esquematismo elaborado de xeito que un concepto poida quedar definido por unha soa palabra ou termo, que actúe como un “gancho” ou “palabra clave” que arrastre máis conceptos que xa coñecemos previamente, construíndo un “mapa” dos coñecementos que queremos lembrar, non explicando os mesmos.

Mindmap cos puntos clave de elaboración de mindmaps. 

Por outra parte, o seu xeito de desenrolo é bastante práctico, xa que partimos do centro do folio onde o elaboramos, tendo maior liberdade e espazo para facer unha organización dos conceptos que iremos anotando.

Borrador de apuntes polo método de mindmap.  

Por suposto que para facer mindmaps non son precisos máis que rotuladores de cores e un folio, se ben esta forma de organización de esquemas é adecuada para o seu tratamento dixital, de xeito que xa existen na rede aplicacións, moitas delas gratuítas, que nos permiten elaborar no noso ordenador mapas mentais fácil e rapidamente.

Mindmap dixital con conceptos básicos de instalacións eléctricas. 

Acerca da súa utilidade, emprego e elaboración teño atopado un curso básico de mapas mentais ben interesante elaborado pola Diputación Foral de Guipúscoa que poño á vosa disposición aquí.

Aparte dunha serie de seis vídeos onde explican detallada e graficamente o seu emprego podes descargar un arquivo en pdf na parte inferior, no link Anexo: descargar manual completo, para telo gardado. 

Se tedes interese polo procedemento (o teño empregado con bos resultados, por certo) vos deixo como remate algunhas direccións web dende onde podedes descargar programas gratuítos, se ben o meu favorito, o Concept Draw Professional que permite elaborar gráficos Pert, Grantt ou eléctricos, é de pago. Fago notar que pode ser unha inversión rendible para estudantes ou xerentes. 

Gratuítos: 

Freemind 

Mindgenius 

Xmind

Personalbrain 

Mindmap para traballo en grupo. 

Bubbl.us 

Mindmeister (en castelán) 

Wisemapping 

Mind42 

Mindomo (encastelán) 

E para rematar un video de mostra con algunhas ideas ao respecto. 

Deica. 

Instalación e primeiros pasos con Dialux (software para iluminación de edificios).

Dende a páxina web de DIAL podedes descargarvos gratuítamente o software DIALUX, unha ferramenta bastante interesante para xustificar cálculos lumínicos, que aparece dividido como un programa para cálculo en interiores e de edificios completos (Dialux EVO 2) e un programa para cálculo de iluminación en viais, instalacións deportivas e espazos abertos (Dialux 4.11).

Despois de terlle botado un ollo admito que a interfaz e as posibilidades de comandos parecen bastante amigables e interesantes, se ben un programa que ofrece moitas posibilidades é tamén complicadiño de manexar. Unha das primeiras dificultades é que a descarga antes recomendada non aporta unha base de datos de luminarias, en boa parte xa que a lista de fabricantes é moi amplia, así como a oferta de luminarias e os empregos das mesmas. Isto obriga a que para operar no programa teñamos que localizar os catálogos da marca que nos interesa (por outra parte un amplio número de marcas ten desenrolado catálogos con formato específico para o emprego en Dialux), descargalo e logo metelo no noso programa creando unha base de datos de luminarias. 

Como o proceso en xeral parece un pouco farragoso (qué principio non o é?) teño buscado información sobre o programa, e ainda que non atopei o manual en pdf sí que descubrín uns vídeos elaborados por por Miguel Vadillo (aquí a súa canle en Youtube, con bastantes vídeos formativos de oferta moi variada) que poño de seguido por se tedes que poñervos co programiña.

1 Descarga e instalación de Dialux.

2 Descarga e instalación de catálogo Philips de luminarias.

3 Proxecto de interior. 

4 Proxecto de interior. 

5 Proxecto de interior (outro local no mesmo proxecto). 

6 Realización dunha película (paseo virtual) co resultado anterior. 

Por outra parte, dende A Coruña Daniel Rocha Crespo (aquí a súa páxina) nos aporta un pequeno titorial de traballo co programa e os arquivos do proxecto que serveu de base ao mesmo. Útil, francamente.

Tamén dende Colombia, un traballiño ou guía para o deseño de instalacións interiores efectuado polos estudantes Julián Andrés Rodríguez e Cristian Alejandro Llano. Moi interesante igualmente, se ben non podemos pasarnos de aplicar a correspondente normativa española.

Deica outra. 

Catálogo visual de estradas de Galicia.

A través da páxina web da Xunta de Galicia chegamos á consellería de Medio ambiente, territorio e infraestruturas, que nos ofrece un catálogo visual de estradas de Galicia. 

Consiste o mesmo nunha base de datos que te permite percorrer visualmente as vías principais das catro provincias galegas, polo menos aquelas transferidas á Xunta de Galicia. Podes facer un percorrido completo polas estradas aparecidas, de xeito completamente visual e poidendo determinar número de carrís, ancho de calzada, peraltes, pendentes, coordenadas UTM e existencia de zanxas, beirarrúas, cunetas... onde sexa preciso trazar redes de servizos. Tamén podes contemplar o estado das infraestruturas e comprobar o trazado de curvas, situación de travesías e localización de rotondas e sinalización. As fotos aparecen coa súa data, o que te permite facer unha idea da súa actualización.

O uso non supón grande dificultade, poidendo facer o percorrido por PKs, pero tamén tes a opción de descarregar un manual en pdf na parte superior esquerda.

Como mostra o inicio do percorrido da estrada AC-404 Santa Comba-Baio. 

Angulos en topografía: unidades, sistemas e introdución en formato Excel.

Como faremos algún exercicio con folla excel, na que haberá que meter datos de ángulos, e estes teñen algunha complicación con Excel, vos fago un pequeno resumo das unidades e sistemas que podemos atoparnos en medición de ángulos topográficos.  

01 Orixe de ángulos horizontais. Cadrantes.

Convén indicar, antes que nada, que a referencia angular para o CERO, en Topografía, é o eixo “y”, que marcará o Norte. Por tanto, unha vez que estacionamos e visamos para marcar un orixe de ángulos estamos marcando o eixo "y" do plano en planta. Isto corresponde coas coordenadas que logo nos aportará a estación total cando lle pidamos resultados en coordenadas. 

O senso de xiro, para ángulos positivos, é o coincidente coas agullas do reloxo. Por iso os cadrantes que se forman nos goniómetros serán os da figura da dereita:

02 Unidades de medición angular. 

2.1 Sistema centesimal (GRA na ET). De lectura inmediata, fácil manexo e interpretación de expresión decimal ou complexa. 

Porro introduciu coa súa taquimetría a división centesimal da circunferencia, que consiste en dividila en 400 partes iguais correspondéndolle a cada un deses arcos un ángulo central que é o grado centesimal. Cada grado divídese en 100 partes, sendo cada unha delas o minuto centesimal, e cada minuto divídese en 100 partes iguais, sendo cada unha delas o segundo centesimal.

Deste xeito o círculo completo ten:

2.2 Sistema sexasesimal (DEG na ET). Sistema incómodo polo xeito de operar cos resultados, temos que facer transformacións.

Se dividimos a circunferencia en 360 partes iguais, a cada un destes arcos correspóndelle un ángulo central do cal a magnitude é o grado sexaseximal. Cada grado sexaseximal divídese en 60 partes iguais, sendo cada unha delas o minuto sexaseximal e cada minuto en outras 60 partes iguais, que son o segundo sexaseximal.

Así pois, un círculo completo terá:

360º = 360 * 60 = 21.600’’ = 360 * 60 * 60 = 1.296.000’’

2.3 Sistema circular (RAD na ET).O número de radiáns que posúe un ángulo é función do arco ao radio, é dicir, é a lonxitude do arco medida co radio como unidade.

2.3 Sistema de milésimas artilleiras.

03 Equivalencia de unidades. 

A equivalencia entre as unidades centesimais, sexaseximais e radiáns queda como segue: 

04 Introdución de datos en Excel. 

Excel opera en radiáns, polo que se facemos unha folla de cálculo temos que efectuar o paso de unidades. Lembremos que os aparatos topográficos miden en sistema centesimal. Por tanto, se nunha celda temos que operar cun ángulo de sistema centesimal, o xeito de facelo será deixando na celda unha ecuación co seguinte formato: 

=G7*(SENO(C7*PI()/200))^2                     

A explicación é que Excel traballa en radiáns, polo que para traballar en sexaseximais ou centesimais hai que empregar PI

Se empregamos sexaseximais (360º) a equivalencia entre sexaseximais e radiáns é 180º = Π rad

 Se empregamos centesimais (400º) a equivalencia é de 200º = Π rad, de onde sae a fórmula anterior. 

O cal queda resumido na seguinte figura. 

Para saber máis: 

Jacinto Santamaría – Teófilo Sanz. Manual de Prácticas de topografía y cartografía. P. 50

José Antonio Pardiñas García, J.A. La estación total. P. 21 e ss.

Martín Morejón, L. Topografía y replanteos. Barcelona, 1975. P. 16 e ss. 

Levantamento topográfico con poligonal pechada e método de reiteración.

Dende Arequipa, Perú, Danny González nos aporta unha serie de catro vídeos onde nos analiza a forma de traballo para efectuar unha poligonal pechada aplicando o método de reiteración. Tras unha introdución teórica, aproveita para explicarnos o funcionamento dunha folla de cálculo elaborada por él, moi completa e que efectúa xa automáticamente conversións e compensacións. Nas descricións dos vídeos deixa ligazón a un vínculo de Mediafire onde vos podedes descargar a folla de cálculo. Se non vedes o link de descarga premedes na información do víeo "Mostrar máis " e ahí vos aparece.

Como complemento, os catro vídeos. Un visionado moi útil. 

Sobre o trazado de curvas horizontais de estradas.

Para o meu inquedo alumnado deixo unha ligazón a trazado horizontal de curvas, hai que irlle botando un ollo para o luns.

Deica.

Canle televisiva da UPM

Vou ter que facer un apartado específico con links ás TVs das universidades que vou localizando en Youtube. 

Desta tócalle á UPM, que xa ten uns cantos contidos entre os que destaco apartados de urbanismo e enxeñería económica. 

A canle Youtube da UPM aquí. 

E como mostra unha pequena referencia sobre a rehabilitación da cidade histórica de Santiago neste video. 

Aviso para os alumnos de 1º de Idc.

Listado dos traballos que faltan por entregar na asignatura de Trazas de Construción.

Avísase que non se recibirán máis traballos a partir do exame, a efectuar o próximo luns.

En caso de duda, contactar co profesor a través do correo ricardovar@gmail.com



Listado de alumnos.
01 Alonso Fernández, J. Falta o 4º traballo, de nivelación en 3D.
02 Araujo López, L.Todo entregado.
03 Arias Rivera, M. Todo entregado.
04 Bernardez Lusquiños, J. Ningún traballo entregado.
05 Estévez Lago, A. Ningún traballo entregado.
06 Fernández Acuña, U.Todo entregado.
07 Ferreira Correia, D. Ningún traballo entregado.
08 Gonzalez Cruces, R. Falta por entregar o traballo de triángulos. O de nivelación en 2D debe colocarse na súa carpeta.
09 Hervello Gomez, J. Falta o 4º traballo, de nivelación en 3D.
10 Morales Fernández, L. Ningún traballo entregado.
11 Mosquera Benitez, A. Falta o 4º traballo, de nivelación en 3D.
12 Peña Romero, C. Ningún traballo entregado.
13 Rivera Bermejo, J. Ningún traballo entregado.
14 Rodríguez Martínez, Y.Todo entregado.
15 Santamarina Pérez, A. Ningún traballo entregado.
16 Senra Iglesias, M. Ningún traballo entregado.
17 Silveira Vázquez, J. Faltan por entregar os traballos de triángulos e de catálogo de suministros topográficos.
18 Simón Salgado, C. Ningún traballo entregado.
19 Venero Gil, A. Falta o 4º traballo, de nivelación en 3D.

Aumentan os contidos da canle Youtube da EGAP

Bueno, parece que a apertura da información faise cada día máis amplia e xa temos á nosa disposición novos temas na canle Youtube da Escola Galega de Administración Pública. 

Rebuscando un pouquiño pola mesma podemos atopar interesantes conferencias sobre contratación pública, urbanismo, procedemento administrativo, enerxías renovables ou novas tecnoloxías.

Se ben manifesto todos os meus parabéns pola iniciativa, se ben sería de agradecer que se publicaran dun xeito máis accesibles as presentacións en formato pdf, que conforman unha documentación ben interesante, e se cadra unha organización máis sistematizada da páxina web e da canle Youtube. 

Como exemplo deixo dous videos das conferencias adicadas a novas tecnoloxías en iluminación pública e a tipificación do solo de núcleo rural. 

Deica.