Dialux. Titoriais para proxectos de iluminación.

Xa teño feita outra entrada de recomendable letura referíndome a Dialux, a páxina dende  a que podemos descargarnos de xeito completamente gratuíto as aplicacións Dialux EVO e Dialux 4.12, mediante as cales podemos efectuar os cálculos de iluminación tanto para interiores como para estradas ou pavillóns deportivos. Incluso podemos baixar unha App para levala no móbil.

Como estes días cambio o ordenador e estou a reinstalar todo, ao descargar os programas observo que están actualizados e con utilidades bastante xeitosas. Así, por exemplo, para escoller luminarias simplemente escolles o fabricante que queres (por poñer un exemplo, Benito Urban) e o programa envíate directamente á casa do subministrador para escoller as luminarias que te interesen. Nas versións anteriores tiñas que buscar na páxina do fabricante e efectuar unha descarga para despois meter a súa base de datos nas utilidades de Dialux, o que era máis ben engorroso e aquí está francamente mellorado. O manexo do programa non parece fácil, e se ben na páxina de Dialux tendes unha sección de cursos, o certo é que estes son caros incluso aínda que os fagas vía Internet. 

Pero podemos regresar ás boas novas, xa que dende o IES San Roque, en Badajoz, o profesor José María Delgado efectuou un par de titorias colgadas en Youtube nos que nos explica cómo abordar o proxecto de iluminación dunha biblioteca ou cómo calcular o índice de deslumbramento molesto con esta útil ferramenta. E como unha imaxe vale máis que mil palabras, aquí temos os vídeos reflexando o proceso con emprego de Dialux. Nos mesmos explica tamén o proceso de importación de datos dos fabricantes. 

Se se vos fai pouco, en Youtube tendes tamén a canle oficial Youtube de Dialux, na que poñen diferentes videos para iniciarse no proceso de cálculo da iluminación partindo desde o inicio. O problema é que están en inglés, claro, pero para iso eu sempre recomendo That's English. E vos aviso que tedes a matrícula aberta entre os días 7 e 20 de xaneiro de 2015.

Se non, aínda que sexa correndo o risco de ir un pouquiño a remolque coas versións, hai outras canles Youtube con titoriais do programa, como a canle de Rivanisimo.

Webgrafía sobre luminotecnia:

Recursos luminotecnia. UPC.

Catálogos y curso luminotecnia Indalux. Construmática. 

Guía IDAE de Eficiencia Energética en iluminación: Oficinas.
Guía IDAE de Eficiencia Energética en iluminación: Centros docentes. 
Guía IDAE de Eficiencia Energética en iluminación: Hospitales y Centros de Atención Primaria.

Saúdos. 

A academia Nancy-Metz: construción en francés.

Dende Francia tamén chéganos hoxe a páxina da academia Nancy-Metz, que ofrece un baccaulauréat en arquitectura e construción dispensado en tres liceos distintos. Polo que teño visto este baccaulauréat, xunto con tres anos máis, serían a formación correspondente en Francia ao título de Enxeñeiro de Edificación, ou Arquitecto Técnico de grao ou o que sexa que son eu, que xa non teño nin idea.

Nesta páxina podes rexistrarte cunha conta como usuario, se ben para iso requírese un mail profesional educativo, polo que parece reservado ao alumnado.

O problema se cadra é organizar a información que colgan na rede, xa que en moitos casos trátase de tips, se ben son novedosos e penso que bastante ben enfocados, presentados como fichas pedagóxicas, que de todos os xeitos non está de máis remirar de cando en vez. Con todo ao parecer danlle bastante importancia ao uso de programas (asunto polo demáis completamente lóxico) polo que podemos comezar pola maqueta urbanística efectuada mediante Sketch Up.

O seguinte, por seguir con outro, sería esta ficha co cálculo dunha viga de formigón armado mediante Autodesk Robot Structural Analysis. 

Outra podería ser a de predimensionamento dunha ponte mixta mediante Eurocódigo, facendo uso do programa ACOBRI. 

A información aportada é bastante ampla, e como vemos abarca obra civil e edificación, sen deixar de lado urbanismo e eficiencia enerxética. De feito un dos documentos que máis me chamou a atención foi un estudio multidominio dun local, que partindo dunha maqueta BIM analiza a distribución de pezas, a iluminación, condicións térmicas e acústicas, así como a resistencia mecánica dos elementos. 

Se seguimos a procurar temos, aparte dos tips, tamén temos ligazóns a cursos interesantes como os cursos on line de Nicolas Tixier ou Nicolas Rémy, a propia páxina de cursos online da Université de Grenoble, ficheiros de carga de estruturas, a base de datos alemana Structurae ou utilidades sobre modelizado 3D e maquetas e prototipos.

Hai que aprender algo de francés, se ben eu podería axudar un pouco na labor. Espero que vos sexa útil.

Felices festas e feliz aninovo. 

Infociments: unha interesante páxina francesa sobre formigón armado.

O que vos traio desta vez, lastimosamente, me temo que solo servirá para aqueles que teñan algunhas nocións de francés. Aínda que a verdade hoxe en día hai múltiples recursos na rede para aprender francés ou calquera outro idioma.

Infociments defínese a si mesmo como o site da industria cementera francesa, agrupada en cinco principales produtoras. 

Dende a súa páxina temos acceso completamente libre e sen necesidade de rexistro a máis de 1.000 artigos técnicos adicados ao cemento, ao formigón e ás súas aplicacións na edificación, na estrada e na enxeñería civil.  

O seu apartado de publicacións é francamente amplo, e abrangue a propia industria cementeira francesa (con informes de actividade, dossier de prensa, estatísticas), cementos e formigóns (cunha completa coleción de fichas técnicas, trípticos e revistas), edificación (cunha impresionante colección de fichas, solucións, conferencias e coloquios) a estradas e enxeñería civil. 

A temática abarcada é bastante ampla, e por ende exhaustiva. Todos os compoñentes, incluíndo armaduras pasivas e activas, os procesos construtivos, o deseño e a calidade e medio ambiente ou incluso a posibilidade de emprego de ferralla de aceiro inoxidable están tratados dun xeito tan minucioso que é francamente difícil atoparlle tacha algunha, e fan que esta páxina deba estar ineludiblemente na carpeta de favoritos de calquera técnico.

Sen pretender establecer comparacións odiosas, sí que podería indicar que en IECA xa poderían botarlle un vistazo, aparte de deixar como de acceso libre programas como o Prontuario Informático do Formigón, felizmente substituído por Zaida Rincón, que non sei a qué ven cobrar, ainda que sexa por un prezo asequible, por unha utilidade da que eles son os primeiros beneficiados.

Calquera outra cousa, deixade un comentario.

Deica. 

Unha guía visual para escaleiras.

Creo que non está mal esta entradiña, a ver se teño tempo de traducila. 

Ti vai facendo.

Unha pena. A día de hoxe vemos na prensa cómo se prevé a legalización de 6.000 edificacións situadas en solo rústico, quedando a regularización a criterio dos concellos.

Se cadra non ten nada que ver a proximidade das eleccións municipais. Se cadra.

Se cadra un día faise en Galicia unha lei mediante consenso entre os grupos maioritarios a fin de parar dunha vez o proceso de marbellización da franxa atlántica. Se cadra. 

Guía práctica para el desarrollo de los proyectos de arquitectura (lousa en cubertas)

Dado que comparto lugar de traballo co Clúster da Pizarra de Galicia, resulta un pracer darlle un pouco de saída dixital ao último traballo que presentaron. 

Para os que non conocérades ao Clúster da Pizarra de Galicia, informarvos que está constituído pola Asociación Gallega de Pizarristas, a Asociación Nacional de Colocadores de Pizarra e a Fundación Centro Tecnológico da Pizarra. Ten a súa sé en Sobradelo, Carballeda de Valdeorras, e no seu edificio administrativo ten despachos, sá de conferencias, laboratorio, obradoiro de colocación e as aulas do IES Sección Sobradelo-Carballeda. A agrupación pretende promover e impulsar o sector da pizarra, así como a innovación tecnolóxica e a adaptación do sector á normativa española e europea. Dado que agrupa a extractores, transformadores e colocadores, abarca tecnolóxicamente a todo o sector pizarreiro, de capital importancia na comarca de Valdeorras e tamén na veciña comarca leonesa do Bierzo. 

Na súa páxina web podedes atopar información detallada sobre todo o proceso produtivo, empresas asociadas, propiedades do material ou normalización e selos de calidade. Con todo, a súa última publicación que motiva esta entrada consiste no libriño "Diseño y construcción de cubiertas de pizarra", elaborado por Fernando López González Mesones, Dr Enxeñeiro de Minas da UPM. O libriño en cuestión podedes descarregalo de xeito completamente legal e gratuíto dende esta ligazón da páxina web do clúster. 

No libro tendes información variada e completa sobre todo o sector da pizarra, abarcando igualmente extracción, conformación de produto, xeitos de subministro, tipoloxías de colocación e aspectos regulamentarios e normativos que abranguen tamén a adaptación ao Código Técnico da Edificación. 

Con todo, o principal aspecto e máis desenvolvido consiste no cálculo das seccións resistentes de rastreis e dos solapes e cravados precisos en función da inclinación, illamento, pesos propios do material, ascensión capilar e sobrecargas de uso e neve. 

Tras botarlle un vistazo rápido se cadra se podería facer algo de crítica no feito de que a aportación céntrase moito nos apartados de cálculo e se ben especifica os procesos de colcoación non presta tanta atención a detalles construtivos concretos, encontros e seccións detalladas. Con todo, as antigas NTE QTP de cubertas de pizarra aportan bastantes destes detalles e isto non desmerece para nada a utilidade da publicación proporcionada. 

En suma, un simpático regalo para Nadal ao que podedes sumarlle a folla de cálculo que dende a mesma ligazón permítenos efectuar cálculos para determinar a sección e cravado dos rastreis de madeira que constituirán a base de entramado para apoio da lousa.

Esperando que vos sexa útil, envíovos un saúdo.

(Nota: todas as imaxes foron obtidas da páxina do Clúster da Pizarra de Galicia ou da publicación reseñada). 

Inasus, enxeñería galega internacional.

Hai tempo xa que estaba seguindo a traxectoria de Inasus, a empresa orixinada polo falecido Xosé Cuíña Crespo, que da man da súa filial Metaldeza vai sorteando a crise e afianza a súa proxección internacional en toda Europa. 

Torre Caja Madrid.

Na súa páxina web ofrécennos máis novas sobre a súa laboura e produtos como as fachadas ECOFAC e as certificacións que ten autorizadas. Se cadra agradeceríase aparte a inclusión na mesma de detalles técnicos e unha descrición máis ampla de produtos, se ben podes observar unha boa relación das súas obras rematadas no seu catálogo multimedia de produtos. 

Inasus parteu dun taller de aplicación de aluminio para construción situado en Lalín, Pontevedra, diversificando ata especializarse na execución de fachadas estruturais e especiais. Lonxe de estancarse no mercado galego a firma continúa abrindo campos e a día de hoxe está completamente internacionalizada ata o punto de ter aberto oficiñas en Madrid, Londres e Panamá, aínda que mantén a súa sé en Lalín. Esta inquietude permítelle agora optar a obras clave como o contrato de 11 millóns de euros para a fachada da nova biblioteca da Universidade de Birmingham, as fachadas do novo hospital de Belfast a sé de Sagrave en Lausanne, a fachada do Concello de Burdeos ou o centro operativo do BBVA en México. 

Universidade de Sheffield. 

Centro operativo Bancomer, México. 

Dada a problemática actual da construción no Estado español polo menos é de alegrarse polos éxitos dunha empresa galega no exterior, un sector aos que poucos apuntaron no seu momento e que hoxe en día é efectivamente unha táboa de salvación, xa que como comentan dende a súa páxina actualmente o 85% dos ingresos de Inasus proveñen dende o exterior. Dende o blogue, un saúdo aos empresarios e os desexos de máis éxitos no futuro. 

Craigslist.

Da igual que pretendas alquilar unha casa, compartir un piso, buscar traballo ou comprar/vender de segunda man. Craigslist é unha páxina web de anuncios clasificados moi sinxela (de feito ten un aspecto en principio excesivamente simple) pero de emprego moi doado se o que queres é buscar vivenda ou comprar de segunda man. Non é preciso nin rexistrarse para ver todo o que ofrece. Con todo sí precisarás efectuar un rexistro se pretendes vender, comprar ou enlazar o teu CV.

Esta web medra cada día recibindo unha asombrosa cantidade de visitas, e de feito xa acada tal popularidade que comeza a ser un problema para a imprensa tradicional, que vai vendo cómo unha das súas seguras fontes de ingresos, os anuncios clasificados, cae en picado desplazándose a sites como o que nos ocupa.

Podedes atopar máis info sobre a páxina e a empresa detrás da mesma na súa entrada de Wikipedia. 

Se queres rexistrarte o proceso é moi sinxelo, non precisas máis que unha dirección de correo electrónico ou un número de teléfono, A partir dalí podes buscar de todo mediante unha palabra clave e poidendo incluír un límite de prezo por compra. Podes procurar unha soa persoa e podes escoller ónde mediante unha busca que comeza por continentes, continúa por países e logo por cidades. Tamén podes activar alertas para recibir información cando haxa unha publicación en Craigslist. Por suposto, todo baixo a túa responsabilidade, e tendo o coidado preciso para navegar con seguridade por Internet, que os anuncios na páxina non están monitorizados e non se pode andar confiado pola rede como demostra esta nova. 

Espero que vos sexa útil. Deica logo. 

Tellas enerxéticas transparentes dende Suecia.

Unha nova tecnoloxía simple e inxeniosa recén posta a punto para aproveitar a enerxía solar. A empresa sueca Soltech Energy está detrás destas tellas transparentes, aparentemente unha eficaz alternativa aos paneis solares. 

"Swedish Solar Thermal Light Absorption Technology" é unha mestura dos medios tradicionais de captación de enerxía solar, a fotovoltaica e a térmica. 

O principio é bastante simple: tellas transparentes de cristal dispóñense sobre toda a superficie de cuberta (de calquera tipo) sobre un revestimento negro concebido para gardar a calor. Un calor captado moi significativo. Sobre o teito dunha gardería infantil de Estocolmo, capital de Suecia, 150 m2 de teito de cristal xeraron en torno a 48.000 kwh/ano. o que da un rendemento dun 320 kwh/m2 por ano, o que significa máis do dobre do consumo enerxético anual dunha vivenda unifamiliar. 

O sistema permite illar os teitos dos edificios, xerar electricidade e quentar auga. Poidendo instalarse sobre calquera tipo de teito, non aparenta ter máis que vantaxes. De feito as tellas poden seguir a quentar auga ainda que non faga sol. Hai un aforro de superficie significativa ao non ocupar máis que a superficie de tellado, e se ben a estética non é un factor esencial, non deixa de importar cando se realiza tal investimento. 

A tarifa depende lóxicamente do tipo de edificio, pero evidentemente non pode determinarse máis que con orzamento previo, que de todolos xeitos pode superar varios miles de euros. 

Para máis información, o artigo correspondente da páxina web de Soltech Energy. En sueco ou inglés, iso si. 

Deica logo. 

MOLA Structural Kit.

Disculparedes o chiste do título, pero a verdade creo que isto é o que máis me emociona dende os xogos para PC.  

Resulta ser que cando Marcio Sequeira de Oliveira facía un máster de arquitectura pensou que, efectivamente, o cálculo estrutural era un tema moi teórico e bastante abstracto, polo que matinou en efectuar un modelo visual que permitira contemplar dun xeito próximo o comportamento estrutural. 

Isto levouno a crear un kit de pezas na liña dos LEGO ou MECANO que servira, mediante a diferente combinación de elementos, para crear diferentes modelos estruturais. A relación básica de pezas podedes vela na seguinte imaxe. 

O resultado é sorprendente, xa que efectivamente diferentes combinacións de pezas levan a obter diferentes tipos de estruturas. Un exemplo o temos nas seguintes imaxes, nas que as pezas imantadas redondas con designación C fan o papel dos nós estruturais, mentres que a colocación nos bordos dos nós de elementos triangulares RC como cartelas permiten a estes nós funcionar como empotramentos. Deste xeito podemos combinar unhas poucas barras (pezas con forma de muelle) con pezas C para facer unha estrutura isostática, que podemos transformar en hiperestática coa colocación das pezas RC arredor do nó para coartar o xiro e converter unha articulación en empotramento, como vemos nas seguintes fotos. 

A tese do Marcio (que podedes descargar dende esta ligazón) demostrou que MOLA pode empregarse como un modelo válido cun funcionamento moi similar ao dunha estrutura real, o que o convirte nunha ferramenta en principio bastante válida para o estudo. 

O interese mostrado polo funcionamento do aparello por outros profesionais dende que en 2005 comezou a deseñalo moveu a Marcio a efectuar o prototipo dun kit que poidera poñerse á venda, o que ten moi bo aspecto e permite para unhas poucas pezas efectuar a montaxe de máis de 100 tipoloxías estruturais, pero que para ser producido a escala industrial e distribuido comercialmente require de crowfunding. 

Para que obteñan os 50.000 reais precisos podes facer unha aportación que pode ir de 20 a 10.000 reais, recibindo unha recompensa que vai dende o mail de agradecemento con mención no libro ata recibir, incluíndo gastos de envío internacionais, 10 kits MOLA para aulas cunha conferencia e sesión práctica. 

As aportacións que podes facer e as vantaxes que podes recibir están todas moi ben explicadas na páxina do proxecto. E, se ben apenas queda un mes para rematar o período de financiamento, os 50.000 reais están superados ampliamente, polo que de seguirse o planning teríamos MOLA nas tendas a partir de xullo de 2015. 

E se non queres ou non podes apoiar económicamente contribúe á difusión da idea compartindo esta entrada. Eu tampouco me beneficio por isto! :) En todo caso se MOLA xa me gustaba polo seu aspecto e utilidade, o seu xeito de procurar financiación mediante crowfunding xa me encanta. 

E para terminar e por se queredes saber máis, un pequeno video coa explicación do proxecto e as ligazóns pertinentes de seguido para ter algo máis que mirar. 

A páxina do proxecto en Catarse (Crowfunding brasileiro). 

Marcio Sequeira. 

FAU. 

MOLA en Arquired. 

MOLA en Estructurando. 

Deica.

Mail dende Kenia.

Hai tempo xa que traballara en Madrid nunha oficina dunha xa desaparecida empresa galega. Raios, a verdade esta crise foi demasiado longa: os dous primeiros anos caeron sobre todo empresas que "sobraban", pero os malos tempos prolongáronse tanto que incluso empresas punteiras que facían I+D+i e que traballaban moi en serio tamén caeron. Esta foi, lamentablemente, unha delas. 

Do paso por aquela oficina non podo evitar lembrar a dous compañeiros, Pablo Moñino e Germán Martín. Estes dous enxeñeiros eran literalmente uns cocazos. Germán era moi bó no desenrolo de proxectos, pero Pablo era un caso aparte. Bilingüe en inglés, o principal aporte que lle vía era a creación de arquivos en formato Excel para o cálculo de elementos estruturais de formigón prefabricado. A verdade acojonaba un pouco velo chegar co seu libro de Cálculo de forjados do doctor Calavera e velo poñerse a encher celdas con fórmulas e táboas, que despois nos pasaba ao resto para que simplemente poñendo uns poucos datos poideramos calcular cerchas, forxados ou losas para os proxectos ou orzamentos que levábamos a cabo. Xunto con Germán crearon unha especie de manual de cálculo de prefabricados que incluía todos os produtos da empresa e resumía o seu emprego e cálculo con táboas e gráficos, aforrandonos moitísimo traballo aos demáis técnicos. Tamén Pablo daba conferencias aos compañeiros (foi él quen me meteu na cabeza o famoso concepto de "trúput") e de propina impartía conferencias sobre a empresa polo mundo endiante. 

E se chegáchedes ler isto se cadra pensaredes que estou falando de dous frikis ao estilo de Big Bang Theory metidos a enxeñeiros de obra civil, pero a realidade era moi outra. Ambos eran persoas cercanas, sinxelas e amigables que cando deixaban os ordenadores divertíanse como o que máis. Das farras que temos corrido non falarei, non é contexto adecuado :) pero tampouco foron nocivas, a verdade.

Posteriormente a empresa non me renovou e busqueime a vida por Galicia. Tiven algún contacto moi esporádico coa antiga empresa, e souben no ano 2010 que estaba en dificultades, e que finalmente botara o peche en 2013. Pensaba a veces no que pasara cos meus antigos compañeiros, pero sentíame bastante tranquilo por Germán e sobre todo por Pablo, estaba seguro que haberían atopar traballo onde fora, e que seguramente habería empresarios dispostos a pelearse por telos en plantilla. Con todo non me atrevía a contactarlles, demasiada xente que coñezo o pasou mal e simplemente non tes ganas de chamar para escoitar historias cada unha máis tremenda que a anterior.

Pero non puiden resistirme cando vin o perfil de Pablo nunha rede social profesional, así que lle mandei unha mensaxe e pedinlle novas, a ver cómo lle iba, e mandoume de volta outro mail facilitándome o contacto con Germán Martín, que estivo en Oriente Próximo pero xa está de volta en Madrid dando caña novamente. Ainda que con respecto a Pablo quedei branco cando me dixo que estaba de misionero en Kenia! Se me esperaba velo nunha oficina punteira dunha empresa inglesa ou norteamericana facendo investigación ou anáilse comparado de metodoloxías de cálculo estrutural resulta que, sumado á Comunidad Misionera de San Pablo Apóstol adica os seus esforzos a construír presas para asegurar o subministro de auga nos períodos de seca para poboacións que están pouco menos que na idade de ferro, facendo fornos de cal para non depender do subministro de cemento e construíndo con terra. Todo isto rodeado de poboación armada e predadores nocturnos, é o que segundo me comenta, e non o dudo, son os anos máis felices da súa vida.  

E como se supón que nos derradeiros párrafos hai que poñer unha conclusión, pois que Pablo é un tipo fóra do común co que comprendín ao pouco de coñecelo que simplemente non podía competir contra él. Pero é que aparte de ser un xenio e un profesional como a copa dun pino é un gran tipo. E síntome orgulloso de telo coñecido. 

Ah, que tampouco despreciedes as redes sociais, que son algo máis que un escaparate, e que hai outras opcións vitais aparte de ser un yuppie. Antes que ser un meigo da enxeñería hai que ser persoa, e tanto Germán como Pablo son grandes persoas ás que recomendo como profesionais e como amigos, aínda que despois de ter escrito isto espero que non me corran a gorrazos!

Deica. 

Nova ferramenta unificada LIDER-CALENER.

Vou con retraso, e últimamente despístaste un mes por culpa dos exames e estás perdido de novo, xa que foi o 12 de maio cando se publicou a nova ferramenta unificada LIDER-CALENER (xa houbo unha publicación en marzo, pero con fallos), que agrupa os programas empregados ata agora para avaliar a demanda enerxética e o consumo enerxético, antes calculadas respectivamente por LIDER e CALENER.

Podemos verificar mediante esta ferramenta as esixencias 2.2.1 da sección HE0 do CTE DB HE, así como o punto 2 do apartado 2.2.2.1 do HE1.

A esixencia establecida para edificios de nova construción de uso distinto ao residencial privado no apartado 2.2.2 da sección HE0 debe verificarse segundo o procedemento básico para a certificación enerxética de edificios. Outras esixencias que resulten da aplicación das seccións HE0 e HE1 deben verificarse por outros medios. Palabras textuais.

En definitiva, que a ferramenta serve para xustificar o CTE, pero non para emitir unha calificación enerxética, que seguirá a efectuarse coas ferramentas dispoñibles ata a data:

Para obra nova: CALENER e CERMA.

Para edificios existentes: CALENER, CE3, CE3x e CERMA.

Dende logo imos ter que facer un cursiño máis (xa fixen un bastante completo e está visto que non chega a nada) para ir aprendendo isto. De momento vos poño as seguintes ligazóns para que vaiades descargando e metendo no ordenata.

Ferramenta de cálculo LIDER-CALENER. 

Manual da ferramenta LIDER-CALENER. 

O blogue de Manuel Alvarez López.

A verdade paso moito tempo surfeando na rede, moitas veces vendo páxinas que prometen moito máis do que dan (normalmente esixindo unha membresía ou o pago directo por cada un dos arquivos descargados) e levando moitas decepcións, pero a veces atopas blogues francamente interesantes imbuidos do espíritu da libre divulgación da información que aportan bastante a aqueles que estamos en temas construtivos, tanto se é polo diario interese da profesión como por aumentar coñecementos, que nunca sobran.

Un destes casos que me animaron foi ver o blogue de Manuel Alvarez López, enxeñeiro de estruturas actualmente afincado en Perú, que me ten ganado pola mano xa que no seu blogue, aparte de artigos e apuntes sobre estruturas, divulga libros de narrativa, fálanos de viaxes, películas, ten a súa lista de páxinas web, ofrece enlaces para aprender inglés ou francés, ou tomar cursos gratuítos ou simplemente falar de política.

A verdade é que sospeito que lle pasou como a min e que cando veu a súa carpeta de favoritos a rebosar pensou que era mellor metelo todo nun blogue e de paso compartir de xeito altruísta a súa información :).

Aqueles interesados na enxeñería civil podedes pasar un bo rato mirandoo, e os que non tamén.

Para sinalar e que non o perdades os que esteades interesados no cálculo estrutural, un recurso bastante útil que tendes á vosa disposición é este curso gratuíto de muros pantalla impartido por Zigurat, no que podedes matricularvos para seguir o proceso dun caso real de muro pantalla empregando o programa CYPE.

Un abrazo a Manuel e saúdos a todos.

Os apuntes de Enxeñería Civil da UPM en aberto.

Onte, mentres mirábades cómo a selección holandesa facía un pandeiro da española, eu estaba paseando pola nube e atopeime coa páxina web da delegación de alumnos da ETSI de Caminos, Canales y Puertos da Universidad Politécnica de Madrid e leveime de novo unha grata sorpresa.

Xa que se abristedes a ligazón e mirastedes un pouco chegaríades á páxina de descargas, onde vos podedes descarregar literalmente ferrados de apuntes, exames, traballos e prácticas das asignaturas de enxeñería superior de camiños, enxeñería de materiais e enxeñería civil e territorial.

Boteilles un ollo e únicamente lamentaría que a maior parte sexan escaneos dos apuntes tomados a man en aulas, se ben uns cantos son presentacións bastante curradas.

En todo caso o volume e orde das publicacións fai desta unha páxina de referencia para todos aqueles que pretendades seguir os camiños da enxeñería civil. Xa tendes para botar un tempiño mirando para eles, incluso se buscades informacións concretas como de asignaturas de cálculo de estruturas.

Saúdos e grazas ao alumnado da escola por poñer toda esta información ao alcance do público.

Programas e textos de mecánica de solos dende Holanda.

Pois púxenme a revisar posts antigos da páxina CivilGeeks, que sinceiramente paréceme recomendable, cando vou e me topo con este post que me leva a un OCW da Universidade Tecnolóxica de Delft (con outros OCWs que parecen interesantes) e máis en concreto a esta páxina, sinxela pero efectiva, publicada polo profesor Arnold Verruijt.

Como veredes se entrades na páxina web do profesor, na mesma ofértanse de balde programas de cálculo de estabilidade de noiros, compresión de soportes metálicos e un curso básico sobre mecánica de solos. Podedes descarregalos sen problemas, xa que son de libre distribución, se ben o autor non se responsabiliza dos resultados.

Tampouco é para nada despreciable a ligazón concreta ao libro de mecánica do solo elaborado polo profesor e actualizado a data do ano 2012. Unha ollada por enriba fíxome bastante graza pola claridade ilustrativa e a formulación. Ten o problema de estar en inglés, pero non vos queixedes, que non está en holandés e todos teremos que aprender algo da lingua do imperio, para o cal non faltan recursos na rede. Iso sí, non despreciedes outras linguas.

Espero que vos sirva de algo. Saúdos.

NG Structures: a App de "Números gordos en el proyecto de estructuras".

Se estades metidos nesto do cálculo de estruturas, moi probablemente coñecedes un fantástico libriño titulado "Números gordos en el proyecto de estructuras".

A filosofía dos autores deste libriño é sinxela: se ben non podemos evitar hoxe en día a utilización de programas informáticos que elaboren un cálculo complexo dunha estrutura de edificación ou obra civil para rematar o proxecto estrutural da mesma, sí é certo que no proceso de elaboración debéramos pasar por unha fase de predimensionado na que establecéramos, coa exactitude suficiente para desenrolar logo os cálculos precisos, un dimensionado de ancho de vigas, sección de columnas e pranta de zapatas que, sendo modificable en función do cálculo obtido, evite un exceso de modificacións durante os cálculos e elabore os mesmos sen desperdicios considerables de material. Eu engadiría que o libriño está francamente ben e non é unha mala introdución ao alumnado que quere aprender a calcular estruturas.

Pois ben, os seus autores pretenderon ir un paso máis aló e xa nos presentan na súa páxina web e na súa páxina de Facebook unha aplicación que nos da os resultados do libriño pero xa sen ter que coller unha servilleta e un portaminas para comprobar o número gordo.

A verdade a aplicación xa nos presta un servicio dende o momento en que probablemente teñamos que tomar unha decisión rápida nunha obra sen ter a man os famosos formularios para cada tipo de viga.

E tamén, por suposto, por se estamos en obra e nos entra a duda da lonxitude de ancoraxe que require unha barra determinada.

Cada problema é abordado de xeito rápido con solución certeira e unha pequena explicación teórica das hipótesis consideradas e o xeito de resolución. 

Outros detalles da interface, por se vos interesan: 

Como pode vir ben, vos deixo lista dalgúns dos problemas estruturais que aborda: 

SECCIONES
- Flexión simple en hormigón armado
- Cortante en hormigón armado
HORMIGÓN
- Zapata
- Muro
- Pilar
- Armado de vigas biapoyadas y continuas
- Flechas en vigas biapoyadas y continuas
- Punzonamiento en pilares centrales, de borde y de esquina
ACERO
- Vigas biapoyadas y continuas
- Pilar / Pandeo
EJECUCIÓN
- Durabilidad
- Descimbrado
- Curado
- Anclaje y solapo
- Control de calidad

A aplicación é descargable dende esta ligazón pagando menos de seis euros, dispoñible para iPhone (compatible con iPad) e tamén para Android.

E vale que é facer propaganda gratuíta, pero penso que a utilidade da aplicación o merece.

Vémonos.

Nova reforma da Lei do Solo de Galicia.

Coa cantidade de reformas que leva a LOUPMRG nos seus escasos doce aniños, agora van e lle meten man de novo.

Cabe engadir de todos os xeitos que a nova reforma paréceme de momento a máis acertada. Se ben haberá que esperar ao texto completo para ver cómo queda, dúas cousas parécenme bastante importantes: empezando por ahí prevese que os concellos de menos de 5000 habitantes poderá aprobarse unha nova figura denominada "Plan básico", que será deseñado específicamente pola Xunta e que eu francamente preferiría que fora obrigatoriamente adoptado por esta para o caso de que non se efectúe polo Concello correspondente un PXOM nun prazo determinado, o que podería evitar desfeitas como que un terzo dos concellos galegos, despois de doce anos de aplicación da LOUPMRG sega sen ter planeamento xeral.

Outra sería a posibilidade de axilizar os trámites de xeito que un PXOM poida redactarse nun período de tres anos en lugar dos seis que chega a levarlle hoxe en día.

Como inconvintes, que a posibilidade de dotar aos Concellos pequenos de planeamento xeral non debe deixarse ao libre albedrío destes, senon que debería impoñérselles chegado o caso ou moitos concellos non chegarán nunca a efectualo. Por outra parte, se ben sería necesario axilizar a redacción do planeamento xeral, é de esperar que isto se faga facendo máis sinxela a documentación a redactar, do contrario non se adiantará tampouco gran cousa.

En fin, esperemos pronto ter máis novas do asunto e que as mesmas sexan favorables.

Deica.

Estradas: nova norma de sinalización vertical.

Se ben me pasou desapercibido, o pasado 7 de abril o Ministerio de Fomento publicou unha nova norma de sinalización horizontal, a 8.1 IC "Señalización vertical", que substitúe a antiga de 1999.

Por se tedes que mirala, vos aporto a nova normativa 8.1 IC, a nota de prensa correspondente de Fomento e o acceso á páxina da normativa técnica xeral de estradas.

Deica.

Operacións básicas con Autocad Civil 3D versión 2013 III: Deseño dunha estrada explicada en videos de Youtube.

Por último, para rematar cos videos de traballos de obra civil efectuados con Autocad Civil 3D, dende a mesma canle Youtube de Israel Rodríguez Fernández, dous vídeos que nos detallan cómo se efectúan trazados de estradas mediante esta ferramenta.

Cabe engadir que, como podemos ver nos vídeos, Autocad Civil 3D permite a inclusión de plantillas e librarías que se adaptan á normativa específica de cada país, como sería no caso de España a norma de trazado de estradas 3.1 IC. Para iso temos que descargar os "country kits" correspondentes ao noso pais que nos ofrece de xeito gratuíto Autodesk nesta outra ligazón, que veñen coa normativa correspondente ao respectivo país e nos que atopamos o .xml que vimos no video.

Saúdos. 

Operacións básicas con Autocad Civil 3D versión 2013 II: Operacións básicas de enxeñería civil explicadas en videos de Youtube.

Continuando co post anterior, no que xa avisei que Autocad Civil 3D 2013 ten moito xugo que quitar, pois me teño atopado coa canle Youtube de Israel Rodríguez Fernández, que aparte de estudar na Universidade de Cantabria creou uns cantos videos nos que detalla, sen sonido pero con bastantes indicacións, os pasos para ir facendo un traballo de enxeñería civil con Civil 3D,

Como aperitivo, podemos ver os seguintes videos referentes ao traballo con Civil 3D:

001 Unión de cartografía - AutoCAD Civil 3D 2013

002 Modelo digital del terreno - AutoCAD Civil 3D 2013

003 Alineación - AutoCAD Civil 3D 2013

004 Perfil longitudinal - AutoCAD Civil 3D 2013

005 Sección transversal - AutoCAD Civil 3D 2013

006 Obra lineal - AutoCAD Civil 3D 2013

007 Cálculo de peralte - AutoCAD Civil 3D 2013

008 Superficie de obra lineal - AutoCAD Civil 3D 2013

009 Informes de trazado - AutoCAD Civil 3D 2013

010 Informe de replanteo - AutoCAD Civil 3D 2013

Hai aínda máis videos que analizan a creación de redes de saneamento ou o traballo con Presto, pero con estes daquí me parece que os neófitos teñen bastante que roer. En todo caso para ver os demáis ir á canle Youtube antes citada, polo demáis moi recomendable.

Deica.