Redúcese cada vez máis o custe da enerxía fotovoltaica.

O Foro Económico Mundial, os mesmos que montan o follón ese de Davos, publica nun informe que o custe da enerxía fotovoltaica reduceuse un 20% nos derradeiros 5 anos, sendo xa competitiva esta fonte enerxética con outras como as centrais de produción eléctrica baseadas na queima de carbón, esperándose que esta enerxía sexa tan competitiva como a do gas natural para o ano 2020. Tendo en conta que somentes nos Estados Unidos instaláronse 125 paneis solares por minuto no ano 2016, a produción de enerxía solar estase convertindo xa nunha alternativa real aos combustibles fósiles. 

Se cadra o problema máis serio que teñen as renovables hoxe en día é que moitas delas fixéronse cunha tecnoloxía xa obsoleta, polo que parece necesario deixar que consuman o seu ciclo de vida a fin de ir sendo substituídas por outras máis rendibles. Parece un proceso largo que se complica precisamente polo rápido desenvolvemento destas tecnoloxías, pero é posible que para 2050 xa teñamos unha alternativa real ao petróleo.

Precisamente para estar preparados para este momento é para o que se precisa vontade política. Esperemos que non falle.

O informe, aquí. 

Saúdos e feliz 2017. 

Titoriais en Youtube de programas de certificación de Eficiencia Enerxética.

Ben, a estas alturas xa coñeceredes os principios legais e técnicos da Certificación de Eficiencia Enerxética na edificación. 

Se non o sabedes, pois moi mal. Pero sempre podedes miralo no CTE DB HE e nas páxinas respectivas de Certificación de Eficiencia Enerxética nos Edificios e podedes descargarvos programas e ferramentas de cualificación no Rexistro de documentos recoñecidos do mesmo CTE, en ligazóns do Ministerio de Industria, Enerxía e Turismo. Si, ese mesmo que este sábado pasado publicou en BOE o RD 900/2015 de autoconsumo, o que inclúe o condanado Impuesto ao Sol. 

Agora ben, saberedes tamén que, de feito, a xustificación das esixencias básicas pedidas polo CTE é bastante complicada, por non dicir inabarcable dende o punto de vista do traballo manual, de operacións en papel e incluso con folla Excel. O certificador de hoxe en día debe contar obrigatoriamente co auxilio de programas informáticos adecuados a fin de emitir os seus cálculos, o que esixe manexo do programa e coñecementos construtivos e de interpretación dos resultados que lle permitan detectar o erro, que usualmente non se revela a non ser moi groseiro.

Como hai que saber de principios construtivos, coñecer a normativa e de propina manexar un programa polo común farragoso e con moitos detalles aos que atender, estar ao día neste eido faise moi costa arriba. Así que, como calquera axuda está ben, penduro aquí uns videos titoriais atopoados en Youtube que francamente teñen boa pinta (aínda non me puxen con eles) a ver se van valéndonos de algo.

O primeiro ven a cargo de ECOEFYS SL, empresa de auditoría enerxética, Entidade de Control e Cualificación Enerxética de edificios, e tamén de Formación especializada.

Esta empresa subiu a Youtube o seguinte video onde analiza cun exemplo un exercicio completo coa ferramenta unificada Lider-Calener (para obra nova). Poño de seguido o video completo, que dura case que dúas horas e media, así que como se pode facer moi longo podedes mirar na súa canle de Youtube, onde podemos atopar o mesmo exercicio dividido en tres partes, facendo a visión máis asumible. Na descrición do video tendes tamén ligazón para baixarvos os arquivos empregados no exemplo, todo  un detalle. Para máis descargas, a dirección de descargas da súa páxina web.

Ricardo Álvarez tamén sube a Youtube un titorial de modelización na mesma ferramenta unificada Lider-Calener (para obra nova). O vídeo, de seguido. 

Adrián Lloret sube igualmente outro video para modelización na ferramenta unificada Lider-Calener (para obra nova). 

Dende a Universidad Miguel Hernández de Elche, e da asignatura Eficiencia Energética, correspondente ao grao de Enxeñería Mecánica, tamén temos unha lista de reproducción na que desenrola igualmente un exemplo de aplicación do programa Lider. Tamén a páxina web da asignatura. 

Engine-er MEC sube tamén un titorial en dúas partes para emprego de Calener VYP (vivendas e pequeno terciario). De momento non ten máis videos, esperemos que continúe. 

Os dous videos, de seguido. 

Certificados energéticos tamén sube unha lista de reproducción enteira na que elabora un titorial de sete videos nos que mostra un titorial de aplicación do CE3X (Edificios existentes). 

E por último guindo un vídeo da canle Youtube de Raúl Carmona Muñoz, que tamén ofrece servizos de formación a través de EasyCTE, páxina de consultoría e formación. Na súa canle Youtube ten bastantes vídeos que abranguen dende o cálculo de estruturas ata instalacións e CTE, e un  deles é o que vos poño no que indica cómo cumprir o DB HE-0.

Bastante que mirar, deica logo e que aproveite! 

Casos de estudo do CTE DB HE1

A asociación nacional de fabricantes de materiais illantes Andimat publica unha serie de casos prácticos de cumprimento do CTE DB HE1, coa pretensión de axudar aos técnicos a efectuar xustificacións do cumprimento do HE1.

Para isto presenta como primeiro exercicio a simulación enerxética dun edificio plurifamiliar de 7 prantas ubicado entre medianeiras efectuando a opción simplificada do CTE 2006 e xustificando as demandas enerxéticas segundo o apartado 2.2 do HE1 do 2013.

O exercicio completo, en formato pdf, eiquí.

Saúdos.

Programa de cálculo de condensacións en pechamentos.

Na páxina web de RVBurke atopamos esta curiosiña ferramenta para calcular as condensacións nos pechamentos.

Podedes descargala nesta ligazón.

Igual a vemos en clase.

Xornada formativa eficiencia enerxética, Oviedo 2012.

Máis ou menos na mesma liña que o comentario anterior vos traio a xornada formativa organizada por FAEN (Fundación Asturiana de la Energía) celebrada en octubre pasado en Oviedo, sobre certificación enerxética de edificios existentes e con posibilidade de descarga das tres poñencias efectuadas. 

Deica. 

Mega post: xornadas técnicas do CTE en Valencia, 2012.

Ben, se por algo me interesa pasear pola nube é pola información que podes obter, cada día máis abundante, de mellor acceso  e de máis calidade. 

Ao respecto unha das miñas queixas correspóndese coa actuación que teñen os colexios profesionais sobre os cursos e documentación sobre novas normativas tan necesarios para calquer profesional de hoxe en día: non lle digo nada novo a calquera compañeiro se lle comento que os colexios profesionais colgan a documentación dos seus cursos en arquivos pdf, se ben aos mesmos solamente acceden os colexiados da circunscripción coa súa clave de acceso á zona privada. Ata ahí máis ou menos ben, pero ocorre que as circunscripcións colexiais de arquitectos técnicos abarcan o eido provincial, de xeito que eu mesmo, que estou de alta nos COAAT de A Coruña e Madrid, non teño acceso á documentación dos cursos efectuados nos colexios de Pontevedra, Lugo ou Ourense, sen ir máis lonxe. 

Nun momento en que nos caen enriba normativas como o CTE ou a de eficiencia enerxética, que obrigan a un estudo exhaustivo das mesmas, por non falar de que a súa amplitude fai imposible un dominio completo das mesmas que por outra parte obriga a unha especialización inevitable, resulta case cómico que os técnicos non teñamos acceso inmediato a apuntes sobre esta documentación. Se a isto engadimos que o acceso ás normas UNE segue sendo de pago, pois parece que se nos esixen cousas ao tempo que se nos dificulta o xeito de logralas. 

Aínda que non lle vexo un remedio rápido a esta situación, sí que lle podemos encontrar algún pequeno alivio con iniciativas como a do Instituto Valenciano de la Edificación, que o pasado abril non solamente celebrou unhas interesantes xornadas sobre a aplicación do CTE á edificación, senon que de propina colgou na súa páxina web todos os pdf das presentacións, xunto cos videos das poñencias e uns cantos enlaces para ampliar información. 

A verdade é tanta documentación que vale a pena baixala e ir mirándoa con tranquilidade, centrándose no documento básico no que requira profundizar. En todo caso queda ligazón ao curso tamén na columna esquerda, no apartado de Normativa Básica e Calidade.

Parabéns en todo caso ao FIVE e esperamos que máis organismos (en especial os oficiais, que son de carácter público e non teñen que funcionar como unha empresa que garde celosamente os seus documentos) se apunten a iniciativas como ésta. 

Feliz antroido.